joboche1
joboche1
joboche1

囂張嘅大學生3

2014/11/17 10:28:49 網誌分類: 齋_TALK_廣東話
17 Nov

大學生嘅天職係要承上啟下,放眼未來. 所有嘅著眼點, 內有無私嘅胸襟, 中有和平嘅氣氛, 外有真理嘅追尋. 承上, 當要革除舊弊, 將不適用於今日嘅, 全部取替! 啟下, 當要成立標杆, 為後代樹立良好榜樣, 正己化人! 身為未來接班人, 冇冷靜頭腦, 處事自然容易出錯; 總會受個人情感拖累; 死剩把口咁咬實所有錯係人哋既錯!

 

至於大學畢業, 對於一班讀咗四年課程嘅一份子嚟講, 係應得嘅文憑, 因為曾經有付出過血與汗! 難得捱到畢業, 又比小撮攪事份子破壞現場氣氛, 其實對其他想攞畢業證書嘅同學唔公平! 既然有人唔想攞, 自己可以唔上台; 或者上咗台後唔接證書, 轉身落番台. 冇人會怪你唔接, 因為你有你嘅原則, 只要你唔好影響其他人就可以.

 

睇到呢班小撮嘅破壞王攪事份子, 攪寸咗頒授證書環節, 仲沾沾自喜, 仲自鳴得意; 仲聲大夾惡, 卻唔知道越愛批鬥, 就越多樹敵, 咁樣對自己未來人生路樹立咗好多障礙. 當然, 今時今日呢班友未知個死字點寫, 當有朝一日出到呢個社會就知味道. 如今做埋神枱猫屎神憎鬼厭, 相信不久嘅將來, 時間會有一個好好嘅答案證明一切.

 

儒家主張反身而誠! 睇怕呢班大學生咁囂張, 都好難會喺當中搵到一個屬於真誠嘅接班人. 筆者相信, 天之道, 無往不復. 更相信剃人頭嘅人, 終有一日比人剃番轉頭. 目無尊長嘅人, 所生嘅都係頂心杉忤逆仔女. 有人話人定勝天! 更有人信個天奈我唔何, 何況其他唔入流嘅人? 不過, 從古到今, 冇人可以鬥贏個天, 不妨放長對眼睇睇!

回應 (0)
我要發表
user