一線曙光

轉載：

學生臥虎藏龍 港府葉公好龍

家陣政治入侵校園，唔少大學生有書唔讀，有堂唔上，一味愛上馬路，令人搖頭嘆息。不過，唔好一竹篙打沉一船人，埋首讀書嘅大學生不在少數，更有年輕人醉心科研，發明創造一鳴驚人添。

嗱，年輕人為港爭光，又有新例子嘞。今次嘅主角係科技大學五名機械及航空航天工程系本科生，今年喺一項全國飛機設計比賽中脫穎而出，喺全國一百五十三隊參賽隊伍中勇奪亞軍，為港爭光可喜可賀。得獎作品係一架取名「游龍」嘅雙座輕型水上運動飛機，設計上有三大特點，包括機翼可以摺疊，減少空間浪費；機翼翼尖向下彎，可以減少耗油兼減低升降翻側風險；機腹以水翼代替傳統浮筒，既能減少飛行阻力，亦能縮短起飛所需距離約三成，設計咁有創意，難怪可以衝出香港，揚威神州喇。五位得獎科大生現正同內地集團合作，為內地私人飛機市場研製雙座輕型運動飛機，預計四年後推出市場，前景可謂無可限量架。

事實再次證明，香港唔係無科研人才，亦唔係無出色科研產品，只係無有為嘅政府，無合適嘅土壤，所以咪就算有臥虎藏龍之士，都被迫游向別人田囉。話時話，游龍五子北上發展，香港流失人才固然可惜，不過大家應該為佢哋感到慶幸至啱，你知啦，港府對科研嘅支援長期不足，科研投放佔本地生產總值比率唔夠一個巴仙，喺亞洲四小龍中叨陪末席唔在講，甚至連唔少不發達地區都不如吖，如果五位學子留喺香港發展，英雄無用武之地，一身才華盞被白白糟蹋嘅咋。

講到呢度，功夫茶又要問候一下港府，究竟你哋幾時至肯大力扶持科研發展呢？係人都知，二十一世紀係科技世紀，只有掌握高新科技，才能掌握未來，港府不思進取，獨沽一味金融地產，唔怪得香港經濟一直無法多元化，前途一直暗淡無光喇。喂，前特首曾蔭權爵士將創新科技列入所謂六大產業，可惜講就天下無敵，做就有心無力，葉公好龍，點不知今屆政府發展科技又係得個講字咋。

冇錯，今屆政府係就係提出開設創新及科技局，本來係暗淡中嘅一絲曙光，結果遭議會拉布阻撓，創科局開局遙遙無期。最不堪嘅係，佔領鬧劇沒完沒了，搞到成個香港天翻地覆，隨時墮入萬劫不復之地，仲講乜鬼發展科研吖。

唉，一樣米養百樣人，同樣係大學生，有人為港爭光，有人專倒香港米。功夫茶奉勸各位瞓街大學生，如果你哋真心為香港好，最有效嘅方法就係學游龍五子，努力讀書，裝備自己，將來為香港發光發熱，而唔係將青春浪費喺街頭，將香港變成「動盪之都」吖！

家教失敗、教育失敗、政府失敗！