佔中_隨筆4_2

未攪清楚, 就謬謬然走上街去走到前線比人利用? 平心而論, 呢位自稱生於亂世嘅同學所持乜嘢嘅理由有呢種稔法, 筆者唔清楚. 同時, 筆者向來都明白到任何事未必一定有啱同錯, 只有接受同唔接受嘅啫. 如果接受, 錯嘅都會被美化成啱嘅; 相反之下一唔接受, 幾啱都好都會被批判成同打壓錯嘅. 所以古人講世事無絕對, 只在乎

個人所企嘅角度同持有嘅想法. 至於個人立場同想法, 有可能同某啲人相同, 亦有可能同某啲人相反. 如果係相同, 當然皆大歡喜, 最起碼你好我好大家好, 最低限度唔會面左左咁冇風度. 如果係相反, 自然話不投機, 稍有一言半語唔啱聽, 隨時就發動罵戰. 故此, 筆者只取一班同學嘅赤子之心, 對於手法方面, 成班學生都唔會覺得

有問題, 只有受佔中侵害逼害傷害嘅市民先至知道呢種手法啱定唔啱. 見解人人不同, 自不然有埋堆有唔埋堆! 依筆者立場嚟講, 對於講咗[和平]而唔算數嗰一日開始就對佔中反感! 加上筆者喺夜班工作人員, 每次要轉車三次要有機會可望上到班, 對佔中呢壇嘢自然心懷怨恨. 不過, 怨歸怨恨歸恨, 筆者對呢班未來接班人都會

感到可惜! 我哋唔係神, 我哋只係凡夫俗子! 如果我哋相信天地間有真主宰存在, 就要相信任何變異嘅狀況出現, 都係造物主對我哋嚟一次試煉. 冇經歷喺冇可能身擔大事; 冇魄力喺唔可以堅毅持久; 冇冷靜喺唔會綜覽全局; 冇胸襟喺冇量度求同存異. 正因為喺咁, 筆者相信經一事長一智, 對中央, 對港府, 對成班同學未必喺壞事.