天仙配

2014/12/17 11:08:54 網誌分類: 生活
17 Dec

「萬寧」今期用印花換購韓國製造嘅煲同鑊,換購即係印花之外、仲要加錢啦!

我買左套Amway煲連中式鑊,廿年前都要六千幾!不過,用左廿年,我覺得佢物有所值;當然,鑊用煲耳都曾經更換過,因為果啲係膠質,冇可能捱倒廿年。

果隻中式鑊,我冇用好耐啦---因為太大!依家買菜都買得半斤(甚至更少),殺雞何需用牛刀呢。

但係,我另外會買一隻細平底鑊用---方便煎蛋餅、魚餅或者班戟之類嘅嘢。

早輪響「萬寧」買健康食品,一次過收左成四十幾個印花。見今期換電氈同煲鑊,電氈我完全冇興趣,煲同鑊嘅換購價也不便宜,所以都冇諗過要換。

不過,後來見屋企個平底鑊面花左;聽講個面花左不宜再用,因為會有致癌物質咁話。因利成便,便以$199會員價加印花換左個平底鑊。

佢有四款煲同鑊可供選擇(每款一個顏色),不過拎上手都幾重----重係好嘅,祇不過如果啲煲再加埋水會好重啫!

其他三款都係連埋鑊蓋同煲蓋,淨係我換呢個平底鑊冇蓋:

買左返嚟試用過,果然係唔黐底!見佢幾好用,於是去配個蓋俾佢,咁咪可以用佢嚟煮埋菜囉!

係咪絕配呀?

如果我儲夠印花,我都考慮換埋個中式鑊(藍色),不過印花以外,會員價都仲要補$469。

唔.....諗諗佢先!

回應 (6)
我要發表
2014/12/18 08:48:01 回覆

睇自己有冇需要嘅啫!

2014/12/18 00:38:34 回覆

攪到我心思思添

2014/12/17 18:57:39 回覆

藍鼠:真係好重!不過,重身先至係好嘢。

2014/12/17 18:05:08 回覆

你吾煮飯,你吾會明白如魚得水的樂趣!

2014/12/17 16:45:58 回覆

咁貴!我很孤寒架,唔捨得買。

2014/12/17 11:26:39 回覆

我本都想換㗎,但拎手好重,所以放棄左,因為我兩隻手都有舊患,拎唔到太重嘅野!

user