冬天補一補!

2014/12/19 13:56:32 網誌分類: 生活
19 Dec

早兩日約左幾位曲友響新世紀廣場飲茶,我好神心咁帶埋個冰袋,諗住順便去廣場間「大棧」分店入貨;心裡面主要係想買鵪鶉,但係果朝得兩包剩餘物資,揀唔落手,所以冇買。

今日無所事事(出完騷好似好失落咁,唔知我兩個仔會唔會呢?冇晒目標添),於是搭車去黃大仙中心間「大棧」入貨。去到門口,首先梗係響門口睇吓海報有咩嘢抵買(人窮係咁架啦!有錢就唔駛格價啦),見倒有$116三包穀飼牛腩仔,每包一磅。我未買過佢嘅牛腩,羊腩試過唔錯!不過,屋企仲有一包,唔買啦----雪柜唔大,每次買急凍嘢都要計住個冰格放唔放得落(有錢就換個超大嘅,唔駛煩啦)。

最終買左三包牛腩仔($116);兩隻法國BB黃雞(呢三日特價$99.9兩隻);一隻鳥雞($108買開嘢特價,正價$118);一包兩隻鵪鶉($68兩隻)。因為未夠四百,所以冇冰袋送----不過有我都唔會要,我帶埋去!要咁多既阻碇、又唔環保!

售貨員笑言:咦!你好識補喎,買埋啲都係滋補嘅嘢。梗係:女人唔補好易老!

牛腩仔好唔好食?要試過至知!反正我貪佢細包---哈哈!人地嫌佢細、我嫌大,係咪傻架?超市牛肋條四十幾蚊一包,我就係嫌太多,一次食唔去,我又唔想餐餐食同一樣嘢!嚴格啲講,我唔鐘意食隔夜餸---我炆左第日至食係另一件事。

返屋企,首先梗係執吓個冰格:放得耐果啲食材拎出嚟,將新果啲放入裡面,再擺番舊果啲出嚟,咁咪唔驚過期囉!

回應 (0)
我要發表
user