差別所在

莫說同人不同命

而係管者唔知埞

人家年年有餘慶

我家周時搏老命

祖家官報發表署名文章指、馬蛟人樂天知命、心懷感激可謂「喜大普奔」、而紫荊人有點叛逆、有點抗拒並顯得「人艱不拆」。少數紫荊人之所以輕風作浪、是因為對「一國兩砌」和「歸本法」缺乏瞭解、以及對龍之大地及對阿爺存有偏見所致。呢嗱、唔知到各位街坊對此評論觀感如何、但在下就有所保留。

在下認識嘅馬蛟朋友之中、根本上無幾人真係會拿起「一國兩砌」和「歸本法」之類嘅有關典籍來閱讀、更加不知其詳細內容係點嘅囉！因此在下點都唔相信馬蛟人比紫荊人更瞭解「一國兩砌」和「歸本法」嘅。馬蛟人是否樂天知命、我唔敢講、得我知到他們年年都快快樂樂過新年。馬蛟人民每到年尾除了獲得雙糧和花紅之外、還獲得政府派發大利是一封、咁就梗係人人樂天、個個感激啦！俗語有話、有福同享、有難同當吖嘛！家陣大家同是特區市民、紫荊人眼巴巴看着馬蛟人個個過肥年、而自己就搵個仙出來刮沙都冇。咁搞法、唔嬲就勢係假啦！係嘛？就係咁、班友仔就不約而同趁著人家黃旗幫發難、撲上街頭發泄一番囉！說甚麼紫荊人不瞭解「一國兩砌」和「歸本法」係假嘅、條氣唔順先至係真嘅！

呢嗱、呢啲咪就係雞同鴨講、講極都講唔掂嘅囉！一般平民百姓都係務實嘅、那裡會關心甚麼政治不政治？人們最關心嘅就係點樣搞好三餐一宿。但係當人們負出一切努力去搞都搞不妥嘅時候、人就自然會變得憤世嫉俗、思想就會鑽到牛角尖去架喇！試問到咗咁嘅田地、仲有何道理可講？現在唔係話叫政府可憐或施捨陷於困境嘅市民、而係拿點誠意出來去為他們開拓一條生路咁啫！政府有責任架！明未？