伯樂、千里馬

很多人、特別是年輕人，經常抱怨懷才不遇。

我在職場打拼幾十年，依家退下火線。根據我嘅經驗，呢個世界、甚至響我地身邊，其實都不乏「伯樂」，問題係：你自問係咪一隻千里馬？

有人會答：我梗係千里馬啦！但係都冇人賞識，想做啲表現都冇人睇。

覺唔覺得呢個答案好有問題？有咩嘢問題？先唔答你。

在早兩星期播出的「2014年萬千星輝頒獎典禮中」，蔣志光憑著《老表，你好hea！》中高音一角奪得「最佳男配角」獎。

蔣志光於1985年踏足歌壇，1993年末退出樂壇後，在TVB開始為電視劇演出。2014年，得到王祖藍邀請，他與韋綺姍在無綫電視電視劇《老表，你好Hea！》中客串，再次合唱《相逢何必曾相識》，令他們的歌唱事業被年輕觀眾所重新認識，他的其他作品也有在劇中出現，如《舊朋友》和《城市儷人》及改編曲《相逢何必曾燒衣》。

蔣獲獎後致詞時感謝王祖藍。他表示：沒有王為他度身訂造這個角色，他這隻千里馬便無法跑出！

但是，蔣志光本身的演技，在過去廿年相信觀眾有目共暏，所欠者祇是一個機會。

依家答番之前果個問題。

千里馬無論有冇人睇，佢都一樣跑得出色！佢唔可以等有人去欣賞佢，先盡力跑畢全程---呢個咪即係究竟有雞蛋先、定有雞先嘅問題囉。咁即係話：一個人唔可以等有人賞識，先至發揮能力----你冇發揮過，人地又憑咩嘢會賞識你先？

我相信一個人祇要肯努力，一定會遇倒你嘅「伯樂」----呢個「伯樂」唔一定係你依家個老板，有可能係你同事(人地依家與你平起平坐啫，難保第日唔會變成你上司！你平日嘅表現，其他人看在眼內，一有機會，便可能成為你的「伯樂」)。所以，千萬不能諗住遇到「伯樂」才發揮能力，因為能力係累積出嚟嘅。

老生常談：機會係留俾有準備嘅人。

當然，搏中六合彩、搏又有解款車跌錢任你執呢啲咁唔實際嘅嘢係要靠命數，同你係咪千里馬無關。

本身冇才能，但係又自以為有嘅，咪得閒去旺角「鳩嗚」搏拉、搏出位囉，唔成仁，便成功！出年係選舉年，一個唔覺意咪可以遺臭萬年囉！