自家製牛蒡茶

我在12月22日「健康」分類網誌介紹過「牛蒡茶」的功效。上星期因見陽光普照，冇嘢搵嘢嚟做(愿諒吓啦！退左休唔搵啲無謂嘢做吓，容咩易抑鬱架！我攪自己啫，總好過啲人無聊到攪亂社會秩序吖)，買左成斤新鮮牛蒡，學人晒牛蒡茶。

人算不如天算，祇晒左一日，跟住幾日都係天昏地暗，下雨兼潮濕，當然唔敢冒險放響晒衣架度，否則淋濕左就前功盡棄。

終於尋日一早見倒太陽伯伯。雖然尋日成日出左街，都好放心拎佢出去晒，今日終於有收成啦---不過，成斤晒埋得番三兩幾！算啦，反正我都係試整啫，遲啲大量買嚟再晒過！而且同晒果皮一樣，我係享受個過程；果皮同牛蒡都係有益食物，有得玩又有得食，何樂而不為？

同女人一樣：整容前、整容後差天共地！

晒完我用白鑊烘過架：

自己晒嘅好處係製成品好乾淨！因為沖茶飲最好唔好再洗以免影響療效，但係現成買果啲又唔敢唔洗。

唔單祇咁，上個月我買左一盆蕃茄仔學人種。買果陣有幾粒經已成熟，一星期後有十幾廿粒收成，剛好夠煲一次湯用！估唔到最近又有另一批開始成熟；雖然唔多，夠我煲一次魚湯架啦！幾cheap吖？我果度菜檔十蚊三包任揀(薯仔、洋蔥、蕃茄)，幾蚊都慳？買肥料唔駛錢呀？我都話好享受個過程咯！好似晒嘢咁---辛苦過湊仔，早上拎出去晒，傍晚又要記得收番入屋！

應該話：唔辛苦邊有得玩吖？用智能電話玩遊戲夠辛苦咯，連識佢嘅人都辛苦埋，成日三更半夜電話響！我都係辛苦自己啫、冇連累朋友呀！