被三隻蛋考起！

唔知各位網友有冇睇過「頂級廚師」(Masterchef)呢個節目，它是無線電視為食台引進國外版權的優秀美食真人秀節目，也是中國首檔美食真人秀節目。《頂級廚師第二季》有來自21個城市的4萬多名烹飪愛好者報名參加。

從四萬多名參賽者中，祇有一名最終能成為「頂級廚師」，過程中一定要披荊斬棘、過五關斬六將！由最初烹調自己熟悉的菜式、以至事先完全冇準備，由大會指定食材做菜式，當然越來越難！但睇了多集發覺，最考起參賽者嘅竟然唔係製作繁複嘅菜式，反而係大家都以為容易嘅食材！

嚴格嚟講，呢個唔係一個烹飪節目，但係從參賽者在製作過程中失敗的經驗、與及評審對製成品的評語，多少學倒一些食材運用或一些烹飪技術。

如果你問很多「無飯煮婦」：「你識唔識煮嘢？」

佢地通常都會答：「都識煮餐蛋公仔麵嘅！」

一位對烹飪全無興趣、亦缺少實踐經驗嘅人都識得煎蛋，你一定認為煎蛋好容易啦！事實不然。

剛睇過果一集，評審要在五個參賽者當中篩走一名參賽者，限時十五分鐘要他們做出以三款雞蛋：

一. 煎蛋：評審標準是兩面都要煎過，蛋邊有少許焦黃，而蛋黃要保持流心(半凝固)狀態；以下相中所見是五名參賽者中，叫做整得最好果位--但其實都祇能說是剛剛合格：因為蛋邊冇焦黃！

二. 烚蛋(poached egg)：用水煮蛋，做出來的蛋要成水點狀(唔可以用模型)，蛋黃一樣要流心(半凝固)狀態；以下相片所見亦是煮得算最好果隻：

三. 溫泉蛋：蛋白要凝固，蛋黃要半凝固。相片所見是五位中最好果個，但係都唔多合標準，因為個黃太生！

結果五個人中，祇有一位算是三款蛋都合格(其他四位中再選出最差果位被叮走)。

尋日我地中學同學每月例會，今次竹戰前在酒店食自助餐，慶祝我地畢業四十五周年。席間我問同學：「我地中學家政課有教過煮烚蛋，記唔記得點煮？」

A：「煲滾水，放過模型落水，再放隻雞蛋落個模度煮熟。」

我：「錯！咁樣煮啲蛋白會四散。咁如果你地係參賽者，你會先整邊款蛋？」

E：「煎蛋！」

F：「梗係唔啱啦！煎蛋最快熟，梗係煮溫泉蛋先啦！」(叻！)

從以上對話，大家應該諗倒，要響十五分鐘內整好呢三款蛋、對一個廚藝了得嘅人嚟講，相當充裕；但係對一些連「溫泉蛋」都唔清楚係咩嘢嘅人(其中一位參賽者以為是用「溫水」浸熟隻蛋！結果，浸完十五分鐘，隻蛋仲係生嘅)、又或者從未試過做烚蛋嘅人嚟講，相當之難！

所以，呢十五分鐘係預埋參賽者會失敗多次嘅時間！咁如何把握此十五分鐘，便一定要事先計劃一吓。有一位參加者在祇剩下三分鐘時間時、仍未開始煮溫泉蛋，真係神仙都救唔倒佢啦。

三款蛋，煎蛋最快熟，所以應該最後做，否則會放涼了；「溫泉蛋」隔著蛋殼煮，所需時間最長，所以應最先做；烚蛋亦要等水滾，所以論次序，應該同時間煲兩煲水，待水滾一煲放入要整「溫泉蛋」的雞蛋、另一煲放少許白醋(可預防蛋白散開，還好大部份參賽者都懂得這樣做)、用湯灼盛著雞蛋放入滾水中做烚蛋。

「烚蛋」因為沒有殼，會最先做好，跟著便較啱時間取出「溫泉蛋」，最後才在平底鑊中煎蛋。

所以，一個這樣的烹飪比賽，除了講求廚藝之外，亦要懂得計劃。做人一樣：大事如工作、置業、成家固然要有計劃、小事如整幾隻雞蛋都多多學問，一樣要計劃---計劃得好自然做得井井有條，否則咪一事無成囉！(當然，如果你老豆/老母大把嘅自當別論啦)