Greyhound
2015/01/03 10:43:37 網誌分類: 生活
上海工作嘅姪女趁聖誕新年假期，回港渡假一星期。好日唔返嚟，返得嚟梗係節目多多，約吓舊同事/舊同事聚會啦！不過，佢點都會留番啲時間同我行街食嘢嘅。
尋日去左「又一城」行。佢建議去Greyhound食晏：泰式fusion菜--望吓個餐牌，有泰式、有西式。不過，雖然我食嘢都唔揀擇，但係可以揀嘅嘢唔多，因為主菜好幾樣都係辣嘅，我唔食！結果我叫左：
一. 法國洋蔥湯：嚴格嚟講，呢個湯唔合格，好咸！
二. 芝士和牛漢堡包：熟悉我嘅人都知，我唔會叫漢堡包食嘅！祇不過可選擇嘅菜式唔多，我又俾佢「和牛」果兩個字吸引左，所以叫嚟試吓！平心而論，最好食係薯條：真係饑不擇食--平時食餐附薯條，我都係剩番響度！一來怕上火、二來又唔係咁鐘意食薯條。不過佢啲薯條唔係硬嘅，點茄汁幾好食；反而個包嘅和牛，真係食唔出同普通果啲有咩嘢分別！牛肉色澤較「麥記」果啲淺色囉。
三. 泰式凍奶茶：其實我經已戒左飲奶茶成個月，不過姪女話泰式奶茶味道同我地飲開果啲好唔同，又即管試吓。呢個餐$98祇包一同二，飲品要另加廿蚊。
平時飲嘅奶茶係淺啡色，呢杯奶茶近乎橙色。飲一啖，太甜！雖然有點花香味，但似是糖的味而不是茶的味，有點假，我唔係咁喜歡！反而十多廿年前試過在印度餐廳飲過一杯有玫瑰花味嘅奶茶，至今仍念念不忘！
聖誕新年雖然都過左，商場的聖誕裝飾仍在：
食完呢餐午飯滯到晚上，所以到我的正常用餐時間都唔想食，姪女都有同感！所以我話：食一個豐富嘅早餐加個晚餐其實經已足夠，午餐真係可有可無架！
這間我食過，覺得唔啱食。