裕華新貌

香港現存的國貨公司，真係五隻手指數唔晒；生意難撈，尤其是國貨，除左店鋪係自置物業之外，都幾難生存！

佐敦裕華除了是自己物業之外，亦有地利優勢，尚算是市民日常生活消閒的一個選擇。國貨公司俾人嘅感覺係店內陳舊、黑暗...年青一輩，很多都不屑內進。

記憶中，裕華好像半年前開始重新裝修；不過並冇關門，維持營業，所以店內不同部門搬來搬去，有一段時間都唔係幾想入去。依家我相信都完成左七七八八，但外牆棚架仍未拆。

我間中都會行吓佢嘅超市，因為種類都幾多，祇是不知是何原故，每次乘電梯落地庫便聞倒一種幾唔好嘅味道，我估計係臘味加埋海味產生嘅化學作用掛！其他超市祇會在就近肉檔的地方才會有難聞氣味。

尋晚離約會時間尚有半小時，匆匆入超市走一轉。

種類仍多，還增加了一個凍柜，祇是佔地很少！凍柜內有長腳蟹、麵包蟹、法國春雞、法國鵪鶉、魚柳....呢啲嘢同「大棧」、「大昌行」同一牌子，但「大昌行」以重量計，比較上貴好多！裕華白/黃春雞都係均一價$58，鵪鶉較「大棧」貴少少。春雞幾大隻，不過我一次食唔去，我寧願買BB雞；屋企人多嘅係一個好選擇。

佢呢度勝在唔同國家嘅食材都有：台灣、大陸、泰國、香港、馬來西亞、越南...品種幾多，去一轉唔駛通度搵！

不過，都係果句：超市雖然裝修完，不知何解，一樣保留住果種難聞氣味！是地庫的原因嗎？