兩個墟！

三個女人一個墟，六個女人咪兩個墟囉！

律師朋友退休後，香港、英國兩邊住，佢幾享受英國生活，不過每次回港都約我地幾個姊妹聚聚。上星期佢剛回港，便叫校監(呢堆女人都係退休校長，有啲退休後榮升校監；得我一個四不像：既非教育界、亦非法律界、更非政棍：唔需要為左選票講違心論、做諱心事.....你out啦！依家做政棍志在收黑金，收夠四年仲唔長歎？話之你仲投唔投票俾佢)約埋食晏。

今次約左響大學站凱悅酒店「沙田十八」。律師一到，便每人派一筒英國買回來的曲奇餅，有薑味、薰衣草味、玫瑰味，我鍾意玫瑰紅色，所以拎左個玫瑰味。

真係睇倒有玫瑰花瓣架！

我：「你拎出嚟，我仲以為係做主禮人放果啲花炮添(職業病，愿諒吓啦)。」

其他人：「又真係幾似喎！」

律師：「少少意思咋，唔好介意呀！」

我們：「唔係講價錢，係你要山長水遠拎咁多嘢返嚟。」我諗起姪女每次收拾行李便頭痕---買埋買埋放唔落喼度！回心一諗：又唔係喎！律師響英國有頭住家，無必要帶太多行李，咁咪可以帶手信囉。

律師：「唔係架，我冇咩嘢行李，淨係要幫老豆帶啲葡萄牙罐頭魚咋。」

我：「吓！香港冇得賣咩？」

律師：「香港冇果種魚。」

幾個女人走埋一齊，冇說張家長、李家短，祇係交流吓認識嘅朋友中嘅健康情況。律師係去年九月尾離港，即係「佔中」事件剛開始，返港時事件又結束左。

我：「你就唔啱啦！冇留響度共渡時艱。」

律師：「我有聽個妹講、亦有收聽當地新聞報導架；不過，依家啲學生真係好得人驚！」

我指住其他人：「嗱！呢啲就係你地教育嘅失敗。」

其他校長：「係！香港教育真係失敗。」突然醒覺(佢地都退左休咯)：「不過唔關我地事！」