麵醬蒸鱭魚

尋日去街市，原本諗住買花蛤，去到才發覺好多魚檔冇開(我相信因為係農曆十六)。得一檔有花蛤賣，六十蚊斤，梗係唔買啦！

冇咩海鮮食，咪食冰鮮囉！見倒啲鱭魚幾大條---平時好細條架！我試過買鱭魚食，佢比較軟身，所以我用粗鹽醃左，用上湯蒸焗嚟食。

有次見人買鱭魚，我多口問佢用嚟點食？佢答煎熟食。不過，我唔想煎喎！

好少有咁大條嘅鱭魚賣，於是有理冇理買左先算；我話買十二兩，魚販係都要我買夠一斤先幫我劏(其實劏呢啲魚有幾難？不過算啦，都係廿八蚊一斤啫)！

買完魚去蛋檔買蛋。蛋叔問我買左啲咩嘢魚(隔住膠袋佢睇唔倒)？我答：「鱭魚。」

蛋叔：「哦！鱭魚？煎嚟食啦！」又煎？

蛋叔：「呀！可以用麵豉蒸。」噢！腦子叮一叮，我一於用麵醬蒸。

材料：

鱭魚一斤

麵醬半碗(其實多少好隨意，鐘意咪多啲，唔鐘意就.....唔好落啦)

一. 麵醬用油開稀(喜歡的也可落生粉)，抹勻魚身，醃最少一小時(我通常一早做左，傍晚煮)。

二. 將魚放上蒸碟，如油太少，可再加油，大火蒸十分鐘。

註：

一. 鱭魚肉地比較削，有啲似獅頭魚，得中間一條骨。依家咁大條，食起上嚟有啲魚油(又有啲似烏頭，不過烏頭肉質較實)，我鐘意食！

二. 麵醬帶甜，不用下其他醃料經已夠味，落多了也不用擔心。