祥興、佳寶、家興

呢三間都係小型超市，響「百記」同「惠記」幾乎壟斷市場嘅情況下，佢地尚可生存，當然有佢地嘅條件啦！

「百記」、「惠記」差不多梗有一間在你左近；「祥興」近年越開越多，鋪位大小通吃；「佳寶」相對分店數目較少，早前我家附近那間「佳寶」結業，我都有點唏噓，因為有些食材(如急凍豬手粒)我覺得佢果啲幾好。

小型超市要響大型連鎖超市中生存，當然要在價格上有所調整---咁梗係價錢便宜、以求薄利多銷啦！

「家興」相對於「祥興」與「佳寶」，分店更少，偏偏紅磡有一間！響我十幾年前搬嚟呢區，幫我剪髮嘅師傅經已同我講：「家興」超市物品較超市便宜很多！

聽佢咁講，咪即管入去睇吓囉！佢嘅貨普遍較超市便宜一兩蚊，但係鋪細貨多、人又多：貨品放到亂七八糟！根本唔想行入去。所以，我響呢區住左十幾廿年，入去「家興」次數，五隻手指數得晒！

近幾個月才知，原來「家興」搬去原本「佳寶」個鋪位，大約三星期前新鋪正式營業。心諗：轉左位罝應該寬敞左，亦較原鋪近左(對我嚟講)，咪又入去行吓囉！誰知一樣咁亂，亦唔可以用八達通付款，幾落後吖？

即使響繁忙時間，啲店員都係穿插其中搬貨；啲貨經常從你頭頂搬過，我唔想一枝竹打晒一船人，十個店員之中都會有一個同你講聲「借借」嘅，不過，啲貨一樣係響你頭頂搬過！我入得去，唔多唔少都買啲嘢，但係付款時，有位女士(可能係老板娘掛)，不斷呼喝正在排緊隊俾錢嘅人---喂！依家唔係唔駛俾錢架，為左慳果一兩蚊俾人呼喝？真係事可忍屬不可忍，以後都唔駛指意我會入去！

至於「祥興」，我以前網誌都有講過，佢啲貨放得比較亂；加上佢門口多數賣菜，所以你可能要濕埋身先入倒鋪內。所以即使我家附近開了不少於五檔「祥興」，我都甚少幫趁---佢啲菜冇錯係便宜，但係要買一斤、甚至兩斤，我食唔去，亦唔想餐餐食同一種菜！

最近「佳寶」重開，仲開正響我樓下。佢鋪位相對「家興」同「祥興」較細，但係貨品擺得企理，又可以用八達通付款；我梗係第一時間幫趁佢買豬手粒嚟整啦！相隔大半年，付款時才發覺收銀果位姊姊都係以前舊鋪果位。

我相熟的女中醫間鋪就在「佳寶」樓上，佢whatsapp告知我此事。我同佢講：「祥興」與「佳寶」，我鍾意幫趁「佳寶」多啲。

中醫：「「佳寶」冷氣較「祥興」凍，肉類保持得較佳，我每次食左「祥興」買嘅肉，肚就唔舒服！」呢個祇係一個例子啫，亦唔排除與冷氣無關、而係顧客嘅問題！好多時見啲人響冰柜拎左食物、行行吓唔想買，隨意放響貨架度；其後又放番入冰柜度，咁樣肉質咪有問題囉！食你唔死都偷笑---呢類顧客響任何一間超市都見倒，睇你住果區/同幫趁果間超市啲人嘅質素！

其實純粹買菜，呢頭都有便宜選擇：雖然我家附近有兩間「惠記」，但我經常幫趁較大/較遠果間，因為較就腳！那間蔬菜由$7-12蚊一包，但買兩包$15，咁你揀兩包$10蚊嘅咪抵買囉！

那間較近的「惠記」，蔬菜$9.9任揀兩包(一般有小白菜、唐生菜、小棠菜、菜心、芥蘭。好新鮮架！當然你太晏去，俾人揀完揀剩就難講)，而且每包都係400克(約十兩)。聽講上午十二點前買滿四十蚊還有九折。我咪買左兩包囉：

既然如此，何解捨近求遠？因為佢要行上石級或斜路，貨物又唔齊全，所以咪要薄利速銷囉！

響街市以外，除左呢幾間超市(不包括「家興」)有菜賣之外，依家都開左唔少菜檔，有些走低檔、有些走高檔，都幾多選擇！所以依家我甚少響街市買菜。即使係肉類，如果響超市見倒啱嘅，都會響超市買埋。所以除左買魚、蝦、蟹，都甚少入街市行！死啦，咁街市檔點生存？