小心！旅行分手危機

成日話「相見好，同住難」，情侶初次去旅行，都好容易出事。身邊唔少朋友試過，同男友/女友去完旅行嘅時候鬧大交，甚至分手！雖然平時都可能日見夜見，但始終一齊去旅行就真要係24小時共處，又要決定去邊度食飯、「盲中中」咁搵路，爭拗嘅機會自然比平時多。咁究竟點樣可以避免分手危機？

1. 短途旅遊：第一次旅行嘅話，應該小試牛刀，揀啲短途嘅去，例如2日澳門遊或者4日台北自由行就夠。長途旅行，都係留返大家認識更深時再去。
    
2. 事前準備：訂機票/酒店，或者plan行程之前，最好兩個人講吓自己有咩要求，一齊協議。千祈唔好乜都無所謂，免得到時嫌貴又或者覺得太差，勉強屈就反而令大家心入面有條刺。
    
3. 保持輕鬆：旅行之中難免會有唔如意嘅地方，例如迷路、錯過咗一個鐘一班嘅火車……但要記住旅行嘅重點係享受兩個人一齊嘅時間，唔好太執着、保持心情愉快，更加唔應該埋怨對方，咁自然減少好多不必要嘅爭執。

雖則無人想分手，但一齊去旅行亦係一個好機會俾你同另一半相處，可能會俾你見到佢性格嘅另一面，令你更清楚呢個人係咪你想要嘅伴侶。