蝦籽素雞上湯浸豆苗
2015/02/11 07:50:06
網誌分類:
食譜
講真,我從來未試過買素雞整嚟食;但上個星期別人的曲社團年,叫埋我去食,佢地帶晒自家製食物,響曲社開餐,其中一味係「南乳炆齋」,除左用南乳調味之外,材料有甘筍、椰菜、素雞、豆泡、冬菇。煮得好好味!通常煮齋多數落津白,真係冇諗過用椰菜都別有風味!可能煮果位係素食者,佢經過多番嘗試,試出呢個配搭。
心諗:下次煮齋,可以買條素雞試吓喎!
又咁啱,尋日操曲,另一位曲友送了兩條素雞給我。曲社在深水埗,因利成便佢響「樹記」買嘅。「樹記」便是早前報導因兄弟不和拆伙,各自自立門戶經營的豆腐製品專門店。
我:「樹記的出品真的好嗎?」
曲友:「係呀!以前去買嘢要等好晒耐,依家新鋪反而唔駛點等;佢啲腐竹好正,我個個星期都用佢嚟煲白粥。」
我:「我最怕食白粥(更怕食白果---因為食得太多啦)!」
曲友:「如果唔係煲白粥,又冇必要響佢度買。」
噓!越叉越遠。
曲友講左:樹記素雞未食要放雪柜(唔係冰格),一星期內要食晒。
--------------------------------------------------------
今日一於食住一條先,留番一條用嚟煮齋。
材料:
豆苗四兩
杞子少許略洗
樹記素雞一條(切厚片)
上湯半杯
蝦籽半湯匙
一. 燒油爆豆苗,下上湯、杞子、糖及鹽調味,煮稔便上碟。
二. 另燒油,將素雞平放鑊上略煎,反轉再略煎另一面,加入蠔油(用少許水開稀)兜勻放在豆苗上,洒上籽籽。
註:
一. 我冇買過素雞食,感覺上「樹記」的素雞好像較其他牌子大件;如果用其他牌子,可能要用上兩條。
二. 我用的是「有食緣」買的蝦籽(經已處理過),所以可以直接食用;否則,要先用白鑊烘過、或用酒煮過。蝦籽響呢味餸度起左好大作用:一字記之曰「正」!不過,落左蝦籽就唔係齋嚟。
我鐘意食素雞,就咁買一條蒸熱食都得,唔使調味!正。
立冬:據曲友講,佢有素鴨。
我都很想試樹記的產品,可惜唔就腳,如果將來超市都有咁就好了.請問樹記有素鴨嗎?我較喜歡素鴨.+1
素鷄鍾意食,但蝦籽已冇食好耐喇。