丹田之氣

很久沒有講粵曲理論了。

曲友學唱粵曲時，通常老師都會講：唱粵曲要運用丹田氣唱，跟住告知同學丹田大概的位置。但怎樣才能運用丹田唱，似乎不了了之-----有些人好彩嘅，自然地用對了位罝唱歌、唔好彩嘅，一世都用唔倒！似乎冇邊位老師會教學生如何可以用倒丹田之氣，即使佢本身用倒(好彩！天生識用)，都唔識如何教人。

丹田原是道教修煉內丹中的精氣神時用的術語，但現在已被各門各派氣功或運氣方法（如唱歌及說話用丹田氣，可減小聲帶受損機會），廣為引用。丹田分上丹田；心為絳火，中丹田；臍下三寸為下丹田。下丹田，藏精之府也；丹田為儲藏精氣神的地方，因此對丹田極為重視，有如「性命之根本」。

玄之又玄的說法：丹田是若有若無之物，祇能意會，不能觸摸，更加睇唔倒！

你試問吓外科醫生，替病人於剖腹開刀時能否見倒丹田？你又問吓腦科醫生，替人開腦時睇唔睇倒佢諗緊咩嘢？思想跟丹田一樣，並非實物，是看不見的。

如此一來，曲友經常有此問題：究竟我唱歌時，是否有用上了丹田之氣？測試是：

如果你連續唱幾支歌，便聲帶疲勞，便有可能你祇係用緊肺嚟呼吸；當中亦牽涉到你是否懂得運氣、留氣。

即使你用了丹田之氣，但如果發聲位置不正確(如用喉嚨發聲)，唱高音便有困難。

所以，唱歌襟唔襟唱、音準均與能否準確運用丹田之氣(識得用、還要識得保持)、能否準確使用發聲位置有莫大關係。

至於唱歌的拍子是否準確，多屬先天：有些人天生便有節奏感，有些人冇！這祇能靠後天下苦功不斷重覆鍛鍊。

至於粵曲中的「長花、木魚、滾花」，要唱得好，有一定難度！好多時曲友天生靚聲、又天生音準，唱小曲時令不少顧曲周郎陶醉，惟是一唱到「滾花、木魚、長花」便原形畢露，令人大跌眼鏡！因為唱長花、滾花或木魚，即使你所有音唱準了，但個「度」(節奏)唱得唔好(呢樣嘢即使老師如何俾心機教，也要曲友本身意會才行)，便完全不是那回事；當然，如果連音都唱唔準，便更加不用說了！