幸福婆婆

我一年中都有十次八次幫趁「麥記」食早餐。雖然去嘅次數唔多，但係每次都見倒幾位婆婆，坐在同一位置，令我印象最深刻是她們都是飲咖啡！

我的感覺是：上了年紀嘅人，唔會喜歡去食「麥記」，除非是孫兒叫到，趁熱鬧！可能是我將心比己啦，你叫我天天吃「麥記」，真係慘過油刑架。

我間中會坐響佢地隔離，所以聽得倒佢地講咩嘢！佢地雖然上了年紀，但言談舉止知書識墨，有兩位還是上海婆婆。

今早去麥記，咁啱又坐響佢地隔離。其中一位婆婆講：「尋日買左條？魚，用蒜頭豆豉蒸，好好食！」但係佢講來講去都講唔出果條係咩嘢魚？

我心諗：用蒜頭豆豉蒸嘅魚，五隻手指都數得晒啦！

於是買鯇魚頭(搭咀)：「係咪盲鰽呀？」講呢啲嘢，實啱咀型，唔會俾人噴！

婆婆：「係呀！係呀！你話係咪好好食呀？」蒜頭豆豉唔係人人鍾意食。我會用蒸頭豆豉整嘢食，祇係要佢啲味，食時會將佢撥開。

我：「咁要睇吓鍾唔鍾意食蒜頭豆豉囉！紅磡街市經常有游水盲鰽賣。」如果你問我，我唔係特別喜歡食盲鰽---縑佢味淡，肉削！

另一位婆婆講：「早兩日去覆診，新抱請唔倒假，個仔陪我去；上車果陣個仔蠢到死，淨係攪住我條腰！我對腳冇力吖馬，佢攬我條腰有咩嘢用。我新抱陪我果陣，就識得託住我對腳。」呢位婆婆要用拐杖。

我：「你個仔肯陪你睇醫生，經已好好架啦！男人通常都冇女人咁細心。難得你新抱對你好之餘、又細心。」大家知啦！女人通常係祇會對自己阿媽細心嘅啫。

另一位婆婆：「你後生果陣咁辛苦湊大啲仔女，依家佢地有孝心係修倒番嚟嘅；你睇吓阿邊個(不在場人士)，佢個仔睬都唔睬佢呀！」

其他幾位婆婆：「抵佢喎！佢果陣時係又打、唔係又打，打到個仔飛起。」

不過，呢個世界唔係有因必有果嘅(佛教徒一定反對)----你對仔女好，唔代表將來佢地會對你好！講到咁灰？事實嚟，依家冇反哺呢樣嘢，佢唔駛你幫佢養埋老婆、仔女經已係萬幸！

你對仔女唔好，亦唔代表佢地一定會對你唔好(惟一解釋咪係你前地欠左佢囉)----有啲人死好命，有啲傻仔傻女扑心扑命照顧佢！不過，都要你有條咁好嘅命先得：物極必反！

睇番呢幾位婆婆，每日風雨不改，相聚於「麥記」食旱餐，天南地北傾番個多小時，經已係人生快事！