懷舊滋味對話

途經油麻地，看見一小店門前排了長龍，拍下照片並傳給朋友。大家繼而在Whatsapp 展開了以下一段對話：

平常心：估下為乜事排長龍

友人甲：北角雞蛋仔？點解無聽過

友人乙：好出名？

平常心：蘇絲黃曾經推介過，而家做到有分店。

友人甲：頭先睇舊雜誌，話 Jenny's Cookies一個月做幾千萬生意，排長龍兼限量發售… 對唔住，真係唔覺得有乜特別，真係唔明啲人心態。

平常心：平嫂's Cookies 仲好食啦 [講笑啫]

友人乙：等緊食

平常心：啲小店出咗名，變成 mass production，品質會走樣。

友人甲：五六年前已食過… 一般而已。

友人乙：好多係鱔稿，但求迎合港人一窩蜂心態。

友人甲：我哋細個時好多嘢都好好食，以前啲嘢好食係正常嘅…

平常心：我細個鍾意食一種街頭賣嘅夾餅，一盤圓形，切開一個個長三角形，中間加砂糖，椰絲，碎花生等。而家唔見有。你哋食過未？

友人甲：食過，而家得格仔夾餅。以前食物新鮮。

平常心：就算係街邊賣嘅牛雜、潮州鹵味、越南春卷...，都好食啲，又無話食咗肚痛。

友人甲：仲有生菜魚肉、碗仔翅、魚蛋、酸齋…

平常心：仲記得灣仔碼頭水餃，我真係喺灣仔碼頭食過，當時兩姐妹做。而家個家姐(定係妹？)都發咗達。當時唔覺得有乜特別。

友人甲：以前無食過。喺超級市場買到嘅，一啲都唔得。

平常心：細個時街口間麵包舖，每日下午四五點新鮮出爐麵包，街尾都聞到香味。我阿媽聞到香味，就會叫我去街口崑山買個菠蘿包或雞尾包食，當下午茶小點。

友人甲：邊間？

平常心：崑山，喺景隆街近駱克道，無咗好耐。後來喺天后見過間同名嘅，而家都好似無埋。

友人乙：細個果陣，深水埗簡直係街邊檔天堂，夜晚一檔檔車仔，太多好嘢食…

懷舊滋味對話，大家意猶未盡… 都在追憶昔日逝去的味覺享受和街邊情懷。

平常心