弄孫為樂?
以前中國人最希望能夠四代、甚至五代同堂,有孫兒湊係賞心樂事!
但係,幾十年前,香港人普遍早婚,孫兒出世,身為祖父母嘅可能祇係四十多歲,尚算年青力壯;加上以前果代女子很多結婚生子後,便留在家中相夫教子,所以,正常情況下,仔大女大兼且結婚後,便替他們湊大子女,似乎順理成章。
但是,近呢幾十年,香港人普遍遲婚。結婚後選擇不生兒育女者大有人在;而決心生育者---如果結婚果陣都接近四十歲,佢地父母都有六十歲,要六十歲的長者幫子女湊大佢地仔女,大家認為如何?
我上樂器班的一位同學,佢每個星期有上粵曲班、樂器班與及操曲。上個月尾下課後一齊飲茶,佢告知要退出所有興趣班,專心湊孫。大家第一個反應係:「你個仔冇請「姊姊」咩?」
答:「有!但係都唔可以指意個「姊姊」架。」不單祇要湊孫,仲要搬埋去個仔度住。
某同學:「即使要幫手湊孫,都唔可以肩負所有責任!你要留番啲空間俾自己,印傭/菲僱每個星期都有假期啦,你咪將所有興趣班安排晒響同一日做,祇要與「姊姊」在不同日子放假便可!冇理由要廿四小時全天候服侍佢地。而且,響佢地決定要孩子的時候,便應該諗掂自己係咪攪得掂,而唔應該指意一位老人家。」咁咪連「姊姊」都不如!
我:「我地大家年紀都唔細!得閒弄孫係開心事,但係如果將此事變成一種工作、一種責任,冇晒自己娛樂,好容易抑鬱架!」
答:「如果我淨係上課,冇時間溫書,一樣冇用!最慘係要幫手買餸,但係連買餸錢都要自己俾!」呢位同學學的是洋琴。
同學:「你咪拎埋個洋琴去個仔度囉!」
答:「梗係唔得啦!洋琴好阻地方,而且有小朋友響度,好唔方便。」
最終呢位同學真係決定退學。
現今的老人家,是否連菲傭/印傭也不如?
老豆養仔、仔養仔;變成老豆養仔、老豆養埋孫又是否合理?
老豆/老母後生時,忙於搵錢、忙於湊小孩,冇自己娛樂!捱到退休,加上年青時儲左些少錢,總算可以搵啲娛樂/興趣渡日,結果又要再捱過!唉,情何以堪!
父母辛苦左幾十年,依家都唔指望反哺呢樣嘢;但求仔女自己生活冇問題,唔駛問老豆/老母攞錢算是萬幸!但已達退休年齡,還要為湊孫煩惱,弄孫經已唔再係樂趣之事!
我親家要返工,佢喜歡返工,為幫女兒才提早退休,佢很錫個女同孫,未退休時已日日放工後幫女兒買菜煮飯。佢兩夫婦日日都要去見的孫,本來住沙田,為見孫兒用綠表買居屋,搬埋去將軍澳住。
應該咁講,我因為唔駛湊孫,他們請姐姐,我又毋需做家務,時間太多,所以才揾野消磨時間!如要湊孫就唔會唱歌!我幫細女時剛開始唱歌,為左湊孫我中止唱歌!直到四女請姐姐才正式學歌。唱歌是精神寄托。我喜歡湊孫架,只是不喜歡家務!無興趣買菜煮飯,覺得很辛苦!
咁係因為佢本身冇咩嘢興趣(可能湊孫變成有世藝),所以冇問題啫!你久唔久才要犧牲幾日做替工,所以亦冇問題!掉番轉頭:如果你惟一興趣係唱歌,要你犧牲唱歌湊孫;當然你間中都可以搵人做替工,但係同人講要唱歌搵人頂,你好唔好意思?你仲可唔可以個個星期北上搵人做替工?
我覺得凢事都是相向,年輕人與老人家都要識做,代溝一定有,看如何收窄!我親家應媳婦之請,(她女兒)提早兩年退休幫手睇孫,因我媳婦意外地有第三名孩子,我睇佢湊得很開心,佢無特別興趣,只是與朋友行街飲茶,年中與弟妹去幾次旅行,去旅行的時間與年輕人商量,有時兒子放大假,有時媳婦放大假,無假就叫我去住幾日,我很開心架!
花姐:如果苦樂參半,都捱得有價值!
真係唔簡單 有人話凑孫如食補品
但有人厭惡至極 自己時間都給剝奪
你說不 即刻反面 以後咪洗睇到孫仔
做人難 做老人也不易 苦啊~
我講果位同學終於捱病左,過年冇醫生睇症,慘!
我曾經諗過,如果將來仔女有BB,我係唔會幫佢地凑嘅,一定留番俾佢地嚐吓做父母嘅滋味,但孫女出世後,我又想佢跟我學唐話,主動同阿仔兩公婆講,可以幫佢地湊BB,但鬼婆心抱話要自己凑,唔想錯過BB成長每一過程,如果我想幫手凑,可以响佢地屋企住,咁我又唔制喎!相見好,同住難,何况彼此文化不同!所以我從未湊過孫架!
兩面睇,有些人很喜歡小孩子架,就一定不覺得辛苦,要睇當事人的心態。呢個問題很複雜。