誰在掩耳盜鈴？

真貨運出假貨來

諸君發難我發財

閉門了解天下事

方知混蛋有人抬

俗語講得好、怪事年年有、今年特別多。明明係水貨客搶高日常必須物品價格、以致大眾怨聲載道。點知忽然之間演變成譴責趕客激進組織鼓吹「講獨」、而基層市民要求打擊水貨活動嘅聲音、就在一遍喊打「講獨」聲中被淹沒咗喇！所以話啫、有政治無道義真係都冇講錯嘅。事實擺在眼前、紫荊城裡面只有正反兩大政治陣營當主角、縣府是佈景板、而一般市民只是觀眾而矣！

縣太爺知到全面打擊水貨活動必會觸怒權貴、如不做點事又恐眾怒難平、惟有取其中庸之道、以收緊單人行空間作交代。點知譽滿江湖嘅白頭陳大教頭指水貨活動是理所當然的事。他嚴厲批評那些將水貨活動視作為走私嘅人乃係無知愚昧之輩、並譴責個別傳媒蠱惑人心令到社會沉淪。陳大教頭認為、要解決北疆受水貨客滋擾嘅辦法絕對不是打壓、而係應該由縣府出面鼓厲和協助北疆居民利用那些停泊車輛嘅荒廢耕地改作為邊境水貨貿易區、無論是供水客掃貨也好、供遊客購物也好、總之能夠起到收入和就業效果、就可以令到北疆這個較貧窮嘅悲情城市脫貧。

唉、一日都係在下唔好、忘記咗話畀陳大教頭聽、其實嗰啲用來泊車嘅所謂荒廢耕地、大多數都已經被人拿去跟發錢商換咗銀両、因此北疆土著大多是叠水之人。注於非原居民嘅市民之所以牙痛咁聲並唔係冇錢開餐、而係眼見縣府只管照顧生意人發大財、無視他們生活開支被水貨活動不斷扯高而感到憤怒。正如有家庭主婦埋怨、去年傷風藥價錢被水貨客搶高三成多。之不過離技山寨嘅梁寨主就話「嫌貴就揀啲平嘅嚟買。唔係嘅話、就自己醫自己。再唔係、就努力賺多啲錢。」坦白講、當人感到無端被拖累條氣就梗係唔順、再加上聽聽埋埋啲風涼話、確係唔嬲就瓦燒啦！呢啲咪就係社會上不同利益階層嘅矛盾囉！既然財爺咁闊佬、拿出公帑去貼那些被戰中拖累嘅商戶、何以不向被水貨活動拖累嘅基層街坊作點補償呢？難道他老人家雙眼真係見高唔見低嘅？