老公和股民的「七年之癢」

有句話係「七年之癢」，結婚夠七年老公就會去滾。點解會係七年，唔係四年五年，又唔係八年九年呢？以前我真係唔知，直到我去炒股票，我就知喇。 

97金融風暴，有一大半人為因素（索羅斯）；03香港大簫條，有一半天災因素（沙士）、一半人禍因素（23條）；好喇好喇，如果唔計呢兩次，咁就得出下列幾個年份：

87年股災，過七年，93年股災，過七年，00年科網股災，又過七年……

次次都差唔多情形，成班友仔炒到喪晒，師奶阿嬸出晒黎，全民皆股，但全民都唔知自己買左邊隻股，剩係知1688就係一路發發，但總唔會睇清人地個中文名叫阿里巴巴，入面有四十個大盜……

次次都炒到幾百倍P/E，乜野叫P/E先？price to earning，即係話你買左一筆錢，然後suppose間公司要幾多年至賺得番呢個價畀你，300倍就係300年，300年呀大佬！你死左投胎，投完胎又再死過，死左又再投胎……300倍P/E夠你輪迴幾轉喇！

唔通，2000年果劑bubble真係咁小兒科，大家可以咁快唔記得晒？原來香港人都咁善忘，記憶力只能維持七年。七年以前既事通通隨風而逝，一個七歲既小朋友問爸爸媽媽：「我係點生出黎架」阿媽答：「可能係隻鶴送黎卦，或者係石頭爆出黎」個阿媽唔係講大話呀！因為佢自己都唔記得左！咁司徒華仲講乜野毋忘六四唧？咁多年前既歷史（在大陸是野史）！

七年之癢點解係七年？梗係啦，因為七年後，個老公根本都唔記得左自己已婚，單身寡佬去媾女有錯呀？