十二蚊店

2015/03/15 13:07:47 網誌分類: 生活
15 Mar

Aeon(前吉之島)最早開設十蚊店,近年變成十二蚊店,一樣其門如市。對小朋友及大朋友嚟講,呢類店有一定吸引力,買到拎唔晒都係一百幾十蚊,但好有成功感!

呢兩年日圓匯率低處未便低,除了去日本旅行,「濕平」果陣啲錢見駛左之外;在香港,不少家品店(如日本城)亦在店內闢一角專賣十蚊八蚊嘅平價塑膠家品。

「759阿信屋」最初祇賣日、韓、台零食,近年大展拳腳,開設化妝品專門店、雲吞麵專門店,急凍食品專門店....近期連十二蚊店都要分一杯羹!

紅磡廣場二樓在「萬寧」與「屈臣氏」中間,原本開設「樓上」,以前我經常光顧;佢大約兩年前結束,最近都要去尖沙咀或旺角才有分店,所以我改左去「大棧」,雖然一樣要去旺角或黃大仙。

「樓上」結束後,由「759阿信屋」取而代之,仍然主打賣零食,其中一小角落售賣急凍食品。近日又轉營,變成「759十二蚊店」。依家日圓咁低,十二蚊係咪貴左啲呢?

所賣嘅嘢與幾條街之隔嘅Aeon相類似,三月份逢星期三有七折。759勝在貨品擺放得齊整,行得舒服。不過,賣十二蚊呢個價錢,大部份都是塑膠用品,間中行吓up date吓自己,睇吓有冇啲新出品都好----日本人頭腦好得,好多廚房好幫手佢地都諗倒出嚟!

此店的一角售賣小型家電,如多士焗爐之類。不過,如果真係要買家電,我又唔會去佢度買!

回應 (0)
我要發表
user