集體回憶--仙劍奇俠傳(DOS版)
九十年代,Windows還未普及(i mean windows 3.1),人們大多仍使用DOS,要輸入command來控制電腦。當年的電腦遊戲,graphic可以靚到乜野地步,可想而知。3D?傻啦!2D,都唔見得會有幾靚。所以,《仙劍奇俠傳》推出時,真係絕對稱得上驚為天人,情況就好似初次見到我老婆咁。
玩法:無聊的回合制攻擊,講真,而家諗番真係幾out。
圖像:遊戲界面的公仔很一般,但它聰明之處,是用畫得超唯美的大量漫畫公仔來交代對白,而且表情多多。
故事:精髓所在!其實諗番轉頭,真係好奇怪,因為,個劇本其實都幾老套--一個無所事事,整日幻想做大俠的少年,去到仙女島,見到有個女仔出浴(老套!),然後英雄救美(老套!),跟住仲要被迫同個女仔結婚喎(老套!),然後,然後佢地居然來一套「一擊即中」,個女仔大左肚!(老套到加零一!!)
但個男主角又要玩失憶,總之就唔記得自己同個仙女成左親,但又帶住佢四圍去尋親,一路去到雲南苗族搵個仙女既娘家……途中個女仔因為大左肚,唔知基因定荷爾蒙失調搞到變身,現出原形--一條蛇!傷心之下離開個男仔(《聊齋誌異》都玩到唔玩啦,老套!),但好快又被個男仔搵番。
同一時間呢,在呢段尋親旅程之中,個男仔又遇到第二個有feel既女仔,劇情,係老套之霸既「歡喜冤家」,TVB最拿手果隻呢~~
跟住經歷左好多冒險,然後仲遇多條女,今次就好dd,玩少數民族,叫做冇咁老套。
然後呢,劇情高潮梗係話個男主角恢復記憶,知道自己原來結左婚(咦?呢句野咁熟既……七年之癢……),於是又喊晒咁走去搵番老婆……
anyway,成個劇情都充斥住老套到震的愛情故事橋段,但唔知點解,當佢變成一隻game,你不但唔會覺得老套,反而會好沉迷,會感受好深。或者,呢個就係game比電影、電視劇更令人容易代入角色的優點吧!
而且,原來講到最尾,先知女主角唔係蛇妖,反而係神既後裔--女媧,就是半蛇半人的!那時候我還不為意,但幾年後我查過一些資料,發覺女媧確實是人首蛇身的。
這隻game,我玩過幾次,但一直都不能打爆機,原因係,當個大佬作最後一次變身的時候,電腦就一定會hang機,唔知乜野原因,總之就試過幾次,幾次都係咁……於是,「《仙劍》爆唔到機」成為我青澀的成長期中一大遺憾,從此心理變態,荷爾蒙失調,一直至今……
想知乜野叫做「傳媒斷章取義」, 睇下兩位仁兄既reply就知啦~~
.起初見到我老婆時, 驚為天人, 就好似dos咁, 冇錯, 果陣我讀緊小學。
.後來同佢做朋友時, 仲驚為天人, 就好似windows咁, 果陣讀緊中學、大學。
.再後來拍拖, 超級驚為天人, 就好似windows XP咁, 果陣做緊野。
.再再後來結婚, 超超級驚為天人, 就好似windows vista咁, 即係而家。
你地班友仔……