四月一日之後..

四月一日？咪愚人節囉！

四月一日？咪係「哥哥」死忌囉！

但係今年四月一日起，全城實施徵收膠袋費喎！

呢樣嘢、超市一早實行左啦！適應真係需時架。

尋日響「美心」買左三個「孖寶蛋糕」，收銀問我有冇環保袋？(我通常都有嘅)

我：「唔係四月一日先開始咩？」

收銀：「係呀！第日呢啲有包裝嘅嘢、唔可以攞膠袋(俾錢咪冇問題囉)。」

心諗：第日買多個冇包裝嘅麵包，咁咪有袋囉！

中午買左件衫，俾錢果陣問：「第日係咪買衫都冇袋？」

收銀：「係呀！要袋便收五毫。」

我：「咁好麻煩，要帶兩個環保袋出街！去超市用過、再袋乾淨衣物，個心唔舒服！自從超市唔俾膠袋，我都買少左嘢---因為環保袋唔裝得多、亦唔裝得重嘢！」

收銀：「你可以叫超市送貨架。」

我：「我試過一次，以後唔制！超市送貨果個祇負責送貨，唔理啲貨物齊唔齊！而且叫人送貨，又要限時限刻等送貨。」

收銀：「我都試過啲貨唔齊，不過最終都追得番。」

我：「咁咪煩囉！如果欠嘅係細數，都懶得去追啦！你諗吓，以前我返工著套裝，一般環保袋都裝唔落！」

收銀：「我地會保留盛衣果個玻璃袋，再放入顧客嘅環保袋，便不用擔心衛生問題。」

晚上，我去買鈕扣之類嘅嘢。我問：「第日係咪冇袋提供？」

老板：「係呀！我地可能會訂啲紙袋代替。不過，紙袋咪仲唔環保！」

女士們的手袋，最基本嘅設施都唔少(朋友經常話我帶住八兩金出街：手袋重)，日後可能仲要帶多兩個、甚至三個環保袋，真麻煩！想當年響國內，買嘢冇膠袋，我最深印象係買生果冇膠袋，要用手捧住幾個橙。今時今日，國內買嘢有膠袋，香港冇，真的是風水輪流轉！仲有添呀，有段時期你北上，通街有人問你換港幣；依家折墮咯，除左響深圳，港幣冇人肯要！