「無線」還有人才嗎?

2015/03/31 11:01:40 網誌分類: 影視
31 Mar

今早出門,剛好遇上隔鄰一對夫妻。在升降機內,男士問我:「你有冇睇尋晚八點半果套劇...」佢問我係因為知道我唱開粵曲,經常聽倒我唱----愿諒吓啦!單位細,好傳聲架。

我:「哦!水髮胭脂吖馬,有睇。」

男士:「你覺得蓋鳴暉得唔得?」吓!陷我於不義?

我:「佢能夠響業界企得穩咁多年,一定有佢成功之處嘅。」講完即刻要加番句:「不過,有啲唱到走晒音嘅、一樣可以生存!仲有歌迷會添。」

男士:「佢之前做過一些劇,我同朋友傾開,佢地認為劇情唔合理。」

我:「哦!咁又唔關演員事嘅,劇情唔合理係編劇嘅問題!你睇吓上一套「衝線」仲離譜啦!個女主角經常著住條熱褲(或者超短裙)響會計師樓上班,佢老板唔捉佢去訓話就奇啦;佢出街連一個小手袋都冇拎、兩手空空連八達通都冇帶,係咪天馬行空吖?」呢樣嘢我諗唔關編劇事,著咩嘢衫應該關服裝部或者導演事。可能佢地未打過寫字樓工,唔知一個正常嘅寫字樓係點樣運作;也許關演員事,係佢堅持要著成咁,露對長腿唔知想吸引邊個?

夫婦哈哈大笑。

果套劇一個二個角色都令人討厭:女主角食飽無憂米(老豆大把),食嘢唔做嘢、做嘢打爛嘢,成日揭撕抵理用把「雞仔聲」講嘢,有人鐘鍾意至奇,但係編劇竟然可以寫到佢咁得人鐘意,可能依家啲人鍾意「蒸生瓜」啦(又可能依家啲年青人個個都係咁!響揀無可揀嘅情況下,搵個老豆大把嘅咪唔駛做都有得上樓囉!

套劇大部份角色都一無是處,可是卻在大結局果集來個一百八十度變性(情),一個二個突然醒覺過去不是,真的是荒天下之大謬!

原本「天眼」都還好少少,不過一個人毀左容都可以整番另一個靚樣,又真係難以置信。不過,算啦,睇劇唔好駁劇(唔太離譜都算),但係尾果兩集鄭嘉穎由一位神探變到傻傻更更咁,又真係不知所謂!呢啲係咪叫做衰收尾呢?呢樣嘢關編劇事啦掛?不過,監製又如何?

又長又老套果套「愛回家」應該快啲返屋企啦!啲人物角色越來越令人討厭---馬壯呢個人根本冇可能可以生存(懶、貪、古惑、在家冇大冇細,應該人道毀滅),淨係馬住「曹總」一個客係唔得架、馬柔很久之前經已講過(幾十歲人扮幼稚、成日當自己係萬人迷、又食又住唔交租,個大佬老奉要養佢過世架)、果個阿豪又唔知佢有咩好(除左沖咖啡叻,木木獨獨)?可能咁樣襯得起一個同樣幼稚嘅馬子妮掛!唔該套劇快啲收皮啦!

蜀中無大將。以前木人巷出身嘅藝員,演技隨歲月捱番嚟,無論個樣靚唔靚,你都睇得舒服----即使某藝員,同一晚連續兩套劇都有份做,你都唔會混淆,因為佢地嘅演技與化妝令你覺得佢地係兩個人。依家啲藝員,來來去去果幾個(可能馬住高層,話之你個樣奸到出汁,一樣可以做好人)---林夏薇八點半睇完、九點半又見佢,連髮型化妝都差不多!真係要定吓神諗吓自己睇緊邊套劇。

高海寧八點睇完,九點半又見----橫睇掂睇都係咁嘅樣!可塑性甚低。

難怪依家韓劇、日劇充斥市場,因為冇人想睇本地電視台製作嘅劇集----編、導、演都唔掂!

回應 (1)
我要發表
2015/03/31 17:11:13 回覆

我唔睇電視劇很耐了!

user