港姐何其多！

近呢十年我都冇睇每年嘅港姐選舉---港姐質素何期差，司儀質素又每況愈下！所以，基本上我唔知邊位係港姐嚟，祇不過間中見倒娛樂新聞報導，才知道某某人是港姐。

「無線」近呢十年阿哥、阿姐、二阿哥、二阿姐走得嘅走，走去內地搵人仔！最長情咪係汪阿姐囉，對「無線」不離不棄。

本來蜀中無大將，起用新人或港姐(貪就手，人工便宜)無可厚非，可惜的是：眼見依家響「無線」自家製作劇集見來見去都係果幾個，樣唔睇得，演技更加....唉！

因為有高層撐腰，即使樣貌唔得、演技唔得，都晚晚要觀眾睇佢地！可能「無線」以為觀眾睇得多就順眼都不定。

此外，原來見得最多果啲係港姐！如果唔係今次姪女回港傾起，我都唔知果啲係港姐嚟(完全冇艷光)！

一位港姐以面部比例嚟講，屬大口扒，權骨又高，不知何解我每次見倒佢都諗起「愛登士家庭」？我雖然唔知佢叫咩嘢水，但係我咁樣形容，我姪女都知我講緊邊個。

一位依家差不多晚晚見都，角色都係形容佢唔係靚女(甚至係豬扒一名)，姪女告知佢係港姐嚟；當年佢當選，被冠以「豬扒港姐」的稱號。我問：「佢果屆仲有啲咩嘢人當選？」姪女話唔知；佢都當選，落選果啲嘅質素可想而知。

同劇另一位，響劇中算係靚女(套劇咁講，唔代表我認同)，佢除左高之外，一無是處：眼耳口鼻走埋一堆，鼻又起角！你唔好理：人地一劇接一劇，飲食節目都包辦埋。

一位響成套劇集都著住短褲/短裙仔，懶音多、講嘢揭斯底裡。我以為女人睇女人與男人睇女人總有偏差，誰知尋日我去銀行與位男性經理傾計，佢一句就話果位阿姐講嘢好吵耳！佢話近期最好睇算係「中奸人」，不過都唔近架啦。

一位唔係港姐(但都係選美出身)，算得上靚女(靚到眼會發光)，不過講嘢怪怪地！可惜吖，遇著套劇本不堪，佢嘅角色衰到冇人有：騙人感情不單祇，仲要騙人錢財！如果講明佢係奸角又唔同。

原本起用港姐、起用豬扒(劇集係需要不同角色嘅)....都唔係問題，問題係「無線」應先安排佢地接受演藝、正音課程吖，唔好虐待觀眾對眼同對耳吖！

噓！你有選擇架馬....罷睇囉！