退而不休！

早兩日教育界朋友有人請食午飯，席設紅磡海逸酒店景逸軒。

都話係教育界飯聚咯，關我咩嘢事？哈哈，我係誇界別架：「哎呀大仔」話我地屬於曲藝界喎！小女子真係愧不敢當。

至於教育界朋友，我識得唔少人架！不過經常來往嘅都局限左女子組，男士免問。

今次請客果位係男性退休中學校長，退而不休，依家響我住果區其中一間大教會做話事人，為人風趣，我2004年退休後，與佢間中都有見過面(梗係一大班人啦)。今次中小學退休校長們約左飲茶，呢位二五仔(佢自稱架：佢之前管理兩間小教會，其中一間響我屋企附近；佢告知逢星期二同星期五，佢會過嚟呢間教會，所以佢自稱「二五仔」)透過whatsapp叫我老友(L總監)約埋我：

「代向Van致候，很久不見她，煩代邀請她出席景逸軒聚會。」

又咁啱果日我得閒，加上有免費午餐兼且咁近我屋企，我當然樂於應約。出席者有十幾人，除左我熟悉果幾位女校長/校監之外，其餘幾位男性校長其實我大部份都認識(佢地亦冇諗過我退左休呢十幾年，與其他女校長/校監一直有聯絡，亦經常有聚會)；女子組亦都冇諗過原來其他人我都認識！有些十幾年冇見，今次見面真係仿如隔世！

每次聚會出席率當然唔會百份百，其中一位女校長告知其他幾位唔得閒出席嘅校長名字。我答佢：我全部都識，仲幾熟添！

於是，食完飯後，負責聯絡果位校長即時加左我入佢地嘅群組---以後有福同享、咁有難都要同當啦----月尾又一餐啦。

雖然席間全部都係退休校長，但係全部都係退而不休(好多校長退休後在原校升做校監/校董)---有人繼續到落後地區推行教育工作、有人做義工、有人得慈善基金支持發展特殊教育工作、有人參與粵劇曲藝創作(唔係我呀：一. 我冇本事創作；二. 我基本上唔入流；三. 我都唔係退休校長)、......

唉，咁鬼嚴肅！好在有位校長(呢位真係新相識)告知佢退休愛上左粵曲，經常去Neway唱K；即時有另一位中學校長叫佢約我唱K。講真，我唔係咁喜歡唱K；不過偶一為之就冇所謂啦----我啦、L總監、編劇夫婦、二五仔加埋呢位校長，夠晒腳啦！其他人？免費請佢地聽啦。

原則上，我個人唔贊成政府將公務員退休年齡延長至六十五歲。雖說現代人壽命較長，但假設一個人廿五歲開始工作，到六十歲都做左卅幾年。人生有幾多個十年呢？即使佢有九十歲命，退休後都係得卅年享樂；如果佢咁唔好彩，得六十歲命，咪好容易在陣亡！

一個人最緊要識得積穀防饑，有個人興趣，退休後懂得安排時間、生活，咁先至活得精彩。