昔日的愛情故事 - 初戀

今日有個朋友問我一D感情問題 , 我俾咗D意見佢 , 不過都係表面意見 , 自由度好高 , 因為呢種問題 , 唔可以一概而論 , 要親身面對 , 先知道點樣處理 . 其實就算係親身經歷 , 都未必可以正確處理到 ......

讀書嗰陣 , 有一個同校嘅女仔P , 因為返學校嘅途中經常會撞到佢 , 久而久之 , 就同佢混熟咗 , 開頭都只係當佢係朋友 , 後尾有次一大班人去搵會考試場 , 我同佢旁若無人咁由朝傾到晚 , 返到屋企之後 , 忽然間覺得有D掛住佢 , 於是就打電話俾佢 , 跟住就開始咗我地每晚嘅電話馬拉松 . 

講得係馬拉松 , 梗係超長啦 , 每晚九點零鐘開始 , 講到十二點幾 , 直到阿媽又鬧家姐又投訴嘈住佢瞓覺先收線 .

平時都經常一大班朋友出街 , 其實都係借D朋友過橋 , 因為每次出到嚟 , 都係同P 糖黐豆 , 同拍拖無分別 , 我當時係咁諗 , 因為之前從來未拍過拖 , 所以當時以為咁樣係無問題 , 咁樣嘅關係維持咗年幾 , 因為我唔想俾人話我重色輕友 , 所以出親嚟都係一大班人 , 而家諗返起都覺得自己好衰好老土 , 不過嗰陣時覺得咁樣係好理所當然 .

有次學校有個function , 四點幾就坐學校旅遊巴離開 , 中途站喺銅鑼灣落車 , 咁啱幾個friend都唔啱路無落車 , 我就同P 開始第一次真正嘅單獨約會 , 嗰次真係好開心 , 發覺原來一對一真係開心好多 , 於是就處心積慮 , 諗定D藉口可以撇甩D friend , 但係我忽略咗一D嘢 , 就係我一路都無拖過佢隻手 ......

都幾戇居 , 嗰時我覺得拖手呢家嘢係好好好重要 , 所以我成日都諗有乜方法可以拖得自然得嚟又可以好特別 , 而且仲要畢生難忘 , 唉 ... 諗起都覺得白痴 ......

過咗一排 , 好快又到考試 , 我D成績掹掹緊 , 所以經常埋頭苦讀 , 見面同傾電話時間相對減少 , 不過只係好短日子 , 喺考試前再出嚟玩多次 , 又係一大班人 , 嗰次仲係我最鍾意嘅活動 - 打籃球 ! 不過嗰次可能係我一生之中 , 打得最唔開心嘅一次 ......

一開始已經覺得個氣氛唔係好對勁 , 因為D friend 都一早認同咗我地係半公開嘅一對 , 但係今日佢地個個都古古怪怪 .

P 嗰日對我好客氣 , 客氣到我以為係第一次見面 , 我雖然唔係好開心 , 不過都忍住無表露出嚟 , 諗住喺今次聚會後先問清楚P 發生乜嘢事 , 點知連問嘅機會都無 , 因為發覺佢竟然同另一個朋友L 表現得非常親暱 , 我個心已經一沉 , 咁啱呢個時候我又射咗一球三分遠射 - 穿針 , P 就企喺籃底 , 食-正-波-餅 ! 我好心痛 , 第一時間衝過去睇佢有無事 , 點知L 已經比我快一步 , 扶住佢膊頭 , 關切慰問 , 我 ... 卒之知道 , 痛 , 係乜嘢感覺 ......

我不停地射Air ball( 即係籃框都射唔中 ) , 根本就心不在焉 , 只係想快D玩完快D走 , 因為 , 我好想喊 ......

返到屋企 , 無胃口食飯 , 媽鬧到我狗血淋頭 , 我沒有反應 , 任由佢繼續鬧 , 反而佢就由鬧變為擔心 , 因為自懂性以來 , 我係首趟無駁咀 .

走入洗手間 , 我以為自己會喊 , 但 , 沒有淚水 , 原來最傷心嘅時候 ,係乜嘢都做唔到 , 乜嘢都諗唔到 , 連喊 , 都一樣 , 喊唔到 .

我好想知道原因 , 點解乜嘢先兆都無嘅情況下 , 會變成咁樣 ?

我無問 , 而且有一段時間無搵P , 因為我怕 , 我驚 , 我唔知自己會唔會喺佢面前喊 , 我一直埋首喺課本之內 , 希望嗰種痛嘅感覺快D消失 .

( 待續 ...... )