唱聚、飯聚

退休後，時間如何消磨？

我好忙架？所以唔驚會抑鬱囉！

月中加入左個教育界嘅群組，尋日開始以後每個月都會有一次「飯聚」、中學同學自從大家退休後亦相約左每月「飯聚」一次、同「哎呀大仔」每月上明輝「唱聚」加「飯聚」一次、與曲友芳芳隔個月「唱聚」與「飯聚」一次、每月一次雙平雙子「唱聚」一次.....呢啲常規活動，經已可以好忙！「飯聚」就話淨係帶人帶錢出席啫、「唱聚」要醒醒定定：之前要溫曲、操果陣又要打醒十二分精神，稍一失神，就會失埋手。

如果要「出騷」，更是忙上加忙。好彩依家習慣左即使「出騷」，都唔會好似最初咁，出騷首歌起碼都操得十多二十次；可能依家啲拍檔水準高掛，好多時夾左唱咩嘢歌後、就台上見架啦！所以依家出騷嘅歌都祇係操得幾次，我講嘅操曲係有晒音樂拍和果種，響屋企口嗡嗡、唸唸有詞果種當然唔計啦。

我地呢啲「飯聚」祇是吃喝玩樂，於人無損，於己有利，更加唔驚會俾人拉！諗落又唔係喎：依家啲人「犯罪」好多時都係無罪釋放嘅，會唔會遲吓「犯罪」果啲無罪、反而「飯聚」嘅人有罪呢？

尋日咁啱，兩個群組同一日「飯聚」：教育界中午響紅磡海逸酒店景逸軒(出席者來自江湖四海，呢度最就腳)、中學同學「飯聚」響覺士道會所，下午開始竹戰，好在地點祇係兩街之隔，剛好一浪接一浪，冇浪費時間。其中一位校長臨行前同我講：「遲啲約你唱K吖？」我梗係答好啦，雖然我唔係咁鍾意唱K。

常規活動加埋非常規活動，足夠令人忙碌啦！