大騷過後

五一勞動節，我同「哎呀大仔」響北區大會堂出騷。果日拖住個喼響上水火車站出，真係步步為營，驚自己時運低，撞倒啲唔應該撞嘅嘢，好彩有驚無險。

果日個騷共八首歌，我唱兩首(佔四份一)，兩首中間得廿分鐘換衫，都幾頻麟！咁啱我約左位化妝師又因事嚟唔倒，要夾硬搵其他化妝師幫忙，時間上亦較倉卒---總之係身心疲累啦。

唱完混在觀眾叢中离開，有位婆婆捉住我:辛苦晒你呀！我答:你坐四個鐘頭，你仲辛苦啦，多謝捧場呀。辛勞過後，一句窩心說話，實令人甜在心裡。

朋友用手機遠距離拍嘅非專業攝影：古渡離愁)

休息左一晚，尋日天色陰暗，個天想喊又喊唔出，又濕、又熱、又焗！成個人好攰，結果咪煲個「粉葛齋湯」攤凍嚟飲囉：

(食譜見10/5/2014「飲食-食譜分類」，今次加多左赤小豆、扁豆)

唔知係個湯見效、抑或係今日天氣好左(陽光普照)，成個人生晒！

下午又要同曲友肥仔大操(rehearsal)，準備月尾個「騷」；通常大操都係正式演出前一個星期進行，不知何解今次早成個月！如果仲未識唱首歌會點呢？

過埋呢個月，下兩個月可以抖抖咯！