人情緊過債

曾有待嫁新娘揚言：「畀五百蚊人情就唔好嚟！」引起全城圍插，近日網上瘋傳一份全港逾二十間熱門婚宴酒店名錄，巨細無遺詳列各酒店的「人情打和價」，以本港頂級酒店半島酒店為例，人情打和價為一千九百多元，貴絕全港。事件引發網民熱議，有人質疑結婚「唔係夾錢食飯」，若擺酒旨在「回本」，根本無意義，對自己及來賓都缺乏尊重，但亦有人指如果去飲有回本價可供參考，可減輕一對新人的負擔，未嘗不可。

該份「人情打和價」酒店名錄由婚宴統籌機構「OiKa愛家」撰寫，是以婚宴菜單中最基本的菜式標價計算，以周末價或正價為準，已包括加一及基本酒水費用，結果是平均費用遠超一般人心中所想的八百至一千元，當中港島區多間酒店的「人情打和價」平均需一千五百元以上，四季酒店更需約一千八百元，港島香格里拉大酒店亦需一千五百一十多元，並非人人負擔得起。

九龍區1200至1500

九龍區酒店的「人情打和價」則差距較大，平均要一千二百元至一千五百元，但位於九龍站的香港麗思卡爾頓酒店則需逾一千七百元，個別位於土瓜灣的酒店就最實惠，僅需約六百元；新界區的酒店「人情打和價」平均為八百元以下，但臨近東涌的香港迪士尼樂園酒店，人情亦要一千四百多元才可「打和」。

若再翻查各酒店的詳細婚宴收費資料，可見半島酒店一圍酒席標價一萬八千八百多元，酒水價二千五百多元，難怪「人情打和價」如此高企；四季酒店一圍酒席亦標價一萬六千多元，酒水價更需三千元，反觀位於土瓜灣的8度海逸酒店，一圍酒只需七千三百多元，更免收酒水費用，非常實惠。

大批網民熱烈討論「人情打和價」名錄，有人指「畀幾多人情自己話事，點解要有唔同地方嘅公價、打和價？」、「我只會視乎同一對新人嘅交情決定畀幾多人情」，形容撰寫這份名錄的人心態需要調整，認為若結婚擺酒要親友夾錢，根本是本末倒置，亦令婚宴失去原本的意義。

「強制性夾錢食飯咩」

有人更言：「無錢就唔好喺酒店擺，我唔會因為係酒店而畀多啲人情。」「家陣強制性夾錢食飯咩，不如預先畀人情再取餐券先可以入席。」認為一對新人決定在哪裏舉行婚宴時，應預算有關的財政負擔，有網民則直言自己十分貧窮，呼籲朋友「唔好畀帖我」。

--------------------------------------------------------------------

個人認同：擺酒唔應該諗住係搵朋友(甚至唔算朋友嘅朋友)笨，要人夾錢幫自己擺酒；朋友做人情祇能當係減低婚禮成本，至於自己要補貼幾多，就要睇吓你同親朋有幾熟，佢地本身經濟條件又如何？

因為擺唔擺酒、或者響邊度擺酒，一對新人應諗清諗楚。

題外話：上個月去飲宴，席設郵輪堤岸。大家知唔知響邊度？主人家半年前同我地幾位同學講：我遲啲嫁女，響啟德郵輪擺酒。

心裡一路都以為係黃大仙舊啟德機場附近。直至收倒請帖，大家傾開點樣去？有人話響九龍灣打的去、有人話響牛頭角地鐵站打的去，總之好似個個知掟，其實又唔係好知掟咁，最終決定響牛頭角地鐵站打的去。

我地果日三個人，有兩個冇帶請帖去。上左的士，我告知司機：「唔該去郵輪碼頭。」其中一位有帶請帖響身嘅攞張帖出嚟，讀埋個街名。

司機：「吓！咁就唔係郵輪碼頭喎。另一個方向喎！」

我：「但係主人家講左好多次係郵輪碼頭喎！」

司機：「擺婚宴果度吖馬？」

我地：「係！」

司機：「咁就啱啦！我去過。」於是車左我地去左座新大廈度，街上有N咁多個地產經紀好熱情咁叫人睇樓。

雖然司機教左我地點行，但係沿路都問左兩個經紀，摸錯兩次先搵倒個正門。

我地幾位同學都諗：反正散席後搭穿梭巴士去到牛頭角地鐵站，都係要打的返屋企，不如直接響果度打的啦！十點四十五分經已散席，但係司儀宣佈十一點穿梭巴士才開出，於是我地決定唔等、直接出去叫的士，誰料職員告知果度冇咩的士會經過----真係行不得也哥哥！第日各位咁唔好彩要去果度飲，醒少少打上call台叫的士，否則就要俾人合法禁固啦。

唔明點解響果度擺酒？我都算黑仔囉！近期收倒請帖，唔係去淺水灣酒店、就係去渺無人煙嘅沙漠飲！我經已公告朋友，以後響呢啲地方擺酒，唔駛預我！