打工仔齊齊請病假

今天是「國際請病假日」，唔講唔知，原來「國際請病假日」發源地係香港，發起人是一群藝術家。

香港打工仔，出名得閒死唔得閒病，請病假「唞唞」，老細同事會認為你是偷懶，言語之中都會單單打打，結果積落一身疲累和不快，外加都市病。 

香港藝術家阿金，兩年前忽發奇想，自訂5月13日為「國際請病假日」，提議都市工蟻一族請一天病假，讓身心小休再上路，但問題是你敢不敢同你公司玩命？

5月13日在歷史上，是廢除勞役的日子，1888年巴西人憑著《黃金法》，廢除了農奴制，今天你我都不是奴隸，但每天在職場上營營役役，和一個奴隸其實沒有甚麼分別。 

過去兩年，在5月13日的每年節慶，阿金都會在網上作出呼籲，約定一班朋友一齊請病假，有數十人說會參加，但結果只有不多於十人出現，他們聚集在西九文化區的海濱長廊，或是臨海寫生，或是沿岸垂釣，貫徹「有病就紓緩病情，冇病就陶冶性情」宗旨，一起進行心理同情緒治療。

冇法子，在香港地要請病假，都唔係一件容易事，萬事俱備，只欠一張醫生紙，與被炒的勇氣，反而遠在波蘭北部的小鎮索波特，珠寶設計師 Karolina Anna Matea卻遙遙響應，呼籲當地冇時間又冇錢的波蘭人請一日病假，來接觸藝術。