飯聚

睇吓個標題，我冇寫錯、大家亦冇睇錯：係「飯聚」、唔係「犯罪」！

寫錯又如何？反正現今香港，公然「犯罪」都冇問題，「飯聚」就更加冇問題啦！

諗落又唔一定喎！既然依家啲人都無法無天，唔守法果啲冇問題、分分鐘奉公守法果啲先有罪都唔定。

「飯聚」係一間食肆名稱：潮流時興玩字吖馬---所以賣磚嘅叫「磚家」、賣粥嘅叫「心滿意粥」.....

此店開在我家附近，估計有兩年多，不過我一次都未幫趁過！何解？我都信吓口碑嘅----相熟果位中醫告知：呢間店食物唔得！咁有其他選擇的情況下，我都唔會試啦。

剛過去左嘅星期六，與豬朋在家竹戰。我地通常打十六圈，差不多晚上九時才打完吃晚飯。往時我地都係落樓下間泰國菜食，去年年尾老板娘告知佢退休返泰國，雖然其後開的仍然是泰國菜，但豬朋覺得往情不再了！

今次其中一位豬朋臨時晚上要開工，所以我地提早開場，打到下午六點晚飯，為怕唔夠時間，豬朋一早定左響「飯聚」開飯，佢係常客，佢認為呢度啲小炒都過得去。

我地叫左：

一. 手撕雞半隻：

我地六點鐘到，侍應告知剩番半隻手撕雞，如要柯打，要盡快，否則冇得食！豬朋食過，佢都認為呢度嘅手撕雞好食。

不過，我個人覺得冇咩嘢特別。將貨就價，用冰鮮雞無可厚非，但係豉油味入唔倒落雞肉度、肉既冇咩嘢味亦「鞋」；侍應拿較剪替我們剪開雞皮。據佢講：雞肉撕開後，將雞皮原塊鋪上，咁賣相靚啲，叫我地連皮食！

佢講到咁：連皮食係好味少少！但係依家講求健康，你會唔會為左好味少少食埋雞皮吖？如果係咁，就唔駛手撕啦！去骨咪得囉。

二. 椒鹽鮮魷：

單睇個賣相唔錯，但係食起上嚟：鮮魷冇咩嘢味亦有點靱！

三. 豆豉鯪魚油麥菜：

呢味菜最初響內地食倒，其後才在香港食肆發揚光大，可惜我響香港至今未食過一間整得好食嘅！呢碟餸，淨係睇個賣相經已好唔得：豆豉鯪魚本身好咸，所以落嘅份量唔可以多。睇吓呢碟餸，好明顯佢將啲豆豉鯪魚埋左個芡、甚至加左啲生抽添，所以真係.....好鬼咸！

四. 蝦醬豆泡銀魚仔蒸豬頸肉：

呢味算係較好食嘅一味！但蝦醬味好淡，如果喜濃味嘅會覺得蝦醬味道到喉唔到肺。不過，佢講明豬頸肉，豬頸肉點蒸都應該爽口，佢呢度好稔：唔似食緊豬頸肉。

五. 咸魚煎肉餅：

唔係幾食倒咸魚味！而且肉餅又乾又硬，好睇唔好食。

埋單$550。

食物好一般，還幸服務尚可以，點都衰唔過幾步之隔果間「皇后冰室」！不過口味嘅嘢，真係....

今次打得十二圈，我竟然打破宿命：有錢贏！我估計係我不宜作長途賽：好多時贏開，但打到最尾果四圈輸突晒----正牌石堅嚟！以後唔打十六圈咯。