難念的經

今日致電給一位很久没見的老友。大家成年冇見，雖然冇見，但係若然對方有事，定必第一時間現身。記得當年我辨工時間因事入院，首先告假嚟探我的便是幾位老友。

呢幾年，大家都相繼退休，反而見面少左。何解？我有我生活，佢有佢忙碌囉！

佢結婚後一直與家姑同住，育有一子，現已成人並在外國工作，所以一向是一家三人行。據我所知，老友是一位好媳婦、好太太。

一個人退左休，即駛係行得走得，無可否認，健康情況已大不如前，如果唔係，亦唔駛退下火線啦！

老友的家姑現年九十八，老友兩夫婦經已與佢同住並照顧左佢幾十年。近幾年，家姑健康大不如前，所以老友兩夫婦必定要輪流守候著她，不能一同外出！所以近呢幾年我地一年都見唔倒一次面。

今朝據老友講，大半年前佢家姑跌親，其後既行唔倒、亦聽唔倒，更經常零晨時份吵鬧，令老友兩夫婦無法入睡！住了幾個月醫院，出院前據醫生講：她出院後，家人起碼要請兩位傭工照顧佢，家中睡床與很多設施都要變更；否則便要送她入住老人院。

兩夫婦經差商後，決定送她入住老人院。唔便宜架，每月駛二萬幾蚊，算是中高級老人院嚟；老友夫婦均是退休公務員，雖然每月有長俸，但因並非高官，二萬幾蚊對她們來說都頗吃力！但即駛請兩位傭工，亦慳不了多少，而且在照顧長者方面，亦未必較老人院適合。加上兩夫婦要照顧一位行動不便、聽覺失靈、終夜吵鬧的長者亦十分吃力。

兩夫婦其間參觀了廿多間老人院，最後才決定入住這一家，近幾星期才叫做放下了重擔，可以有覺好瞓。

家姑至今未適應新環境，老友夫婦最初一日去探訪三次，現今一日一次探訪，其實都有壓力，偏偏親朋對她們的決定並不諒解，認為她們既然不用上班，何解仍要將老人家送到老人院？朋友認為旁人針唔拮到肉，根本唔明白別人的困境，吵了一輪，在有理說不清的情況下，祇好掛線！

我跟她說：其他人唔明白你，我好明白。過去你如何對待家姑，我有目共睹；依家大家都年紀大，唔駛別人照顧而可以自顧經已好唔錯！我記得幾年前我阿媽零晨時份在家跌倒，我一個人要扶起佢都好吃力(我手無縛雞之力，我揸筆架)，近兩年腰骨受傷，每用力過度，腰骨便痛，更曾經痛到企都企唔直要去急症室！所以，以我地嘅年紀，根本很難照顧完全冇自顧能力嘅長者！我阿媽入住老人院後，情況一年好過一年。講真吖，如果有朝一日我行動不便，我都寧願入住老人院。

當然，唔係太多人有我嘅經歷，所以你未必認同！但係做人祇要問心無愧，根本唔需要向其他人交待；你受嘅苦、佢受過咩？