補習社 社區中心 學校既唔同

三樣都教過

連鎖既補習社有好多地下活動 好似要買package 出席率等目標達唔到又可能用d手段控制家長 而對導師就當然衰 可能返工頭幾日話係學野會冇糧出 話有陪訓其實咪就係呢段時間自己學野 我見過個補習學校既女副校長鬧學生蠢過隻豬 但學生返屋企會唔會同家長講呢。。。補習社如果收到投訴 由於家長受制於個package 勞動階層多數係咪俾左錢所以繼續俾仔女補丫 而仔女既成績同所謂表現 係逼出黎 但佢地會大壓力 學得機械式 會冇愉快學習經歷

社區中心 無論係家長 管理層同導師多數著重個心 成績可能放第二 曾經教個playgroup 份宣傳刊物話會愉快學習 家長都希望個小朋友愉快學習 个俾意見話比狡多字 字比較深 仲話個小朋友係黎玩架咋 又有個家長 同樣想托管咁 個小朋友上兩班 中間既空檔有個幾鐘 佢可能買餸去耐左冇接小朋友 又可能真係有心放個小朋友嚮度托管 不過小朋友真係幾開心 我教開既英文班既小朋友仲同我好friend 所以話 學野唔止係學術 補習社俾唔到人情味 而小朋友同職員既互動多 又學到好多生活層面既野

課程方面 社區中心對導師要求日益提高 當然會重視有冇讀過教師課程 都著重經驗 佢地會嚮導師工餘時間同導師溝通 睇下材料可以點安排 而好既中心會要求導師工餘時間寫課程大綱同進度表 我強調係工餘時間 呢個就睇得出導師既愛心同職業操守 仲有責任心 佢計時薪但做咁多額外野 佢可能只係因為要照顧屋企仔女先由學校老師變社區中心導師 佢之前教學校既閱歷又幫助中心同學校課程逢結 所以報補習班同興趣班要了解中心同導師既質數同係咪負責任 可以多些剷上去了解日常運作

而學校 大概唔算有得揀 小朋友如果學唔好 有家長就帶小朋友補習 或者參加加強輔導班 課後英文班等 分別在於人數比較多 教師兼顧既野都會多 照顧唔到某些學生 而學校重法治 有學生搞事就理左搞事既先 教師一個人負責晒 唔同社區中心有社工們既支援 講起社工 社區中心社工越多越好 佢地好識同小朋友玩 如果小朋友好細 又見唔到媽咪就大哭 社工哥哥姐姐就幫到佢 又有禮物帶返屋企喎

師資呢 有時我覺得 受尊重時會做得好好多 請家長尊重每一位導師 時薪既就盡量唔好俾佢成日做義工 因為佢平時嚮屋企同中心都嚴重超時工作。。 。如果你早半個鐘黎要小朋友上埋免費補習 就對導師實在唔公平 不過你黎到佢都推唔到 會覺得唔好意思 同時覺得 你咁唔好意思架？ 至於補習社 鬼得閒理你 俾錢啦 俾錢啦

我鐘意教社區中心 因為呢個真係俾人生存既地方 遠離食錢怪 多一些童真 多一堆感情