麻醬蕃茄涼拌
2015/06/14 18:57:07 網誌分類: 未分類
上個月與曲友上深圳操曲,完左佢話約左太太響又一城食晚飯,問我有冇興趣一齊食。我認識佢太太,反正好耐冇見,所以咪一齊食囉!
佢太太響又一城「五月花」搵左位通知我地。果陣祇不過係五點半,侍應竟然問我地七點走得唔得?心諗:果日閒日至喎,有冇咁旺呀?
七點離開果陣,見門口好多人等位。心諗:誰說香港經濟不景?
曲友住響九龍塘,佢太太早幾年患上惡疾,依家雖然好番,但食得好清淡。佢告知響又一城咁多間食肆當中,呢間煮法最清淡----可能因為咁,香港人依家講求食得健康,所以其門如市啦!
果日叫左碟餐前小食:涼拌鮮淮山----鮮淮山切片灼過,淋上日式芝麻醬。
係咪好好食?見人見智啦!首先你一定要接受日式芝麻醬至得(有少少醋味果種),我份人唔揀飲擇食:每樣嘢都肯試,試過唔鍾意咪唔食囉!
上個月試用蕃茄代替鮮淮山,當午餐食;我覺得唔錯喎:
其後我都試過整鮮淮山,不過我覺得蕃茄配芝麻醬較鮮淮山好味。今日再整:
試後感:第一次好食啲。何解?第一次啲蕃茄較熟。
材料:
熟蕃茄(但不要過熟,因為切開後太多汁會影響芝麻醬味道)
日式芝麻醬
一. 先預備凍開水。
二. 蕃茄連皮放滾水內一會,取出放入凍開水內浸一會,用小刀取去皮,每個切成四至六份。
三. 用保鮮紙包住放雪柜內。食前取出淋上芝麻醬。
我同你一樣,唔揀飲擇食,咩都肯試,試過唔中意咪唔食囉!