姪孫演折子戲

響美國土生土長嘅姪孫女不知何故，竟然愛上粵劇！更難得嘅係佢父母(即係我姪仔/姪新抱)又全力支持。

佢前後學左兩年，據佢講：佢識得唱「唐伯虎戲點秋香」、「游龍戲鳳」．「折梅巧遇」同「拾釵」選段。以佢來講，在家講廣東話，出外講英語，中文字差點係完全唔認識，所以學唱粵曲祇能靠聽及模仿，唔識睇中文但係要背晒啲曲。佢今年八歲，但記憶力強，亦冇懶音，最緊要係佢好有表演慾。

今個星期佢響美國嘅藝術機構應邀回港匯演，姪孫演「唐伯虎點秋香」平喉，另演「游龍戲鳳」子喉。

唐伯虎

李鳳姐化緊妝

阿媽與我，邊個靚啲呀？

跟佢一齊應邀回港演出嘅小朋友共十一位，姪新抱上星期回港與姪孫參與彩排後，認為姪孫響唱果方面尚有進步空間；佢whatsapp我，問我可唔可以幫姪孫執曲？因為其他演出小朋友一早回港搵老師執曲；依家才搵人實在太遲！但由於姪新抱要先前往上海公幹，結果上星期五零晨才返港。所以星期六匆匆忙忙同姪孫執左一小時，尋日正式演出啦！

小朋友記憶力真係非同小可！我初時好擔心響咁短時間內糾正佢唱嘅方法，可能越幫越忙；沒想到我一指出佢嘅錯誤，佢即時便改得倒！心想：希望佢瞓醒覺都仲記得啦！

我係第一次睇小朋友做折子戲。最初係冇咩嘢寄望嘅，但係真係冇諗過其中不少小朋友係好有粵劇細胞嘅----唱方面當然唔可以要求太多，但係粵劇做手、佢地真係做得有板有眼架。至於姪孫，做方面問題不大，唱方面較之前真係進步左，雖然仍然差一點點，但係佢得果八歲人仔，都唔可以太苛求啦！

尋日演出者最細嘅祇得三歲！我三歲果陣都唔知識行未？

講真吖，呢班小朋友，響粵劇方面前途真係無可限量！