細胞分裂

主流泛民黨派今日會舉辦退修營，商討政改否決後嘅最新政治局勢、與中央及特區政府嘅關係、以及年底區議會選舉同明年立法會選舉嘅協調部署。據了解，主流泛民除咗面對傳統對手建制派及近年崛起嘅激進本土派外，即將又要迎戰因政改爭議而分裂出來嘅溫和泛民，面臨三面夾擊。據悉已被民主黨（白鴿黨）踢出黨嘅立法會前議員黃成智、以及早已跟白鴿黨貌合神離嘅立法局前議員狄志遠，已決定正式組黨搶攻未來兩場選舉，大混戰一觸即發！

我哋接獲可靠消息，黃成智同狄志遠已決意籌組新政黨，並獲得多名支持「和理非非」（和平、理性、非暴力、非粗口）嘅「金主」(我真係想知係邊啲金主？會唔會又係死肥佬呢？佢見依家班「飯人」攪到神憎鬼厭，會唔會另外搵班所謂較溫和人士另起爐灶，等佢啲衰嘢可以借屍還魂)出錢支持，最快可在十一月區議會換屆選舉投票前成立，打正旗號派出約十名溫和泛民及中間派人士參選。即使未能趕及於區選前成立，該批候選人亦會以聯盟方式出選，希望在過往只有建制派與主流泛民對決嘅區選中，殺出一條新血路。據悉，黃、狄二人將於下月初赴台灣取經(又係台灣？一個二個當台灣係佢阿爺？係取經、定係取錢？)，並商討籌組新政黨嘅細節。

籌組後嘅新政黨，亦會全力參與明年立法會選舉(咁仲駛講嘅，組政黨梗係為參選啦！選贏左「黑金」、「白金」都袋袋平安)。當中最理想係喺五大直選選區各派一人參選，最少亦會於當選門檻最低嘅新界東及新界西各出一人，希望借助比例代表制嘅特性，以不多於一成得票在兩區各取一席。人選方面，黃成智當然係出戰新界東嘅不二之選，新界西方面則有傳為做過葵青區議會主席嘅白鴿黨前成員周奕希，亦不排除會派新面孔參選。

據悉，新政黨唔會「明刀明槍」向白鴿黨等主流泛民黨派「撬人」，但若有志同道合人士自行退黨再要求加盟(真係有金主嘅，唔駛叫都大把人自動過檔啦)，新政黨亦無理由拒絕。

對於因湯家驊辭職而引發、預計明年初舉行嘅立法會新界東補選，據聞黃成智與狄志遠對應否參戰有不同意見。黃成智認為，今次補選係為新政黨宣傳嘅最好機會，即使明知勝算不大亦應一試。不過，狄志遠則認為補選係單議席單票制，派人參選極可能會與主流泛民候選人「攬住一齊死」，讓建制派漁人得利，令新政黨背上「隱形建制派」、「建制Ｂ隊」等污名，損害其公眾形象及長遠發展。其實狄志遠嘅憂慮不無道理，但最終要睇黃成智能否戰勝個人參選欲望，以大局為重。(咁佢都好慘嘅，落選後「三失」呀！佢算唔算溫和？唉)