要高清定標清？

那天老婆問我，數碼廣播等唔等如高清電視。我諗，好多人都有疑惑。其實高清是數碼廣播的其中一種，還有另一種－－標清。我家裏的電視機，32吋sharp lcd tv，唔夠資格播高清，只能夠做標清。咁都好既，反正，高清又點唧？我寧願睇標清算喇！

論畫質，高清冇錯係靚係正，但標清都已經有DVD水準啦，仲想點？D影音發燒友成日話呢隻黑色夠層次呀，果隻紅色夠實呀，憑我那近視兼散光的眼睛，根本就睇唔出分別！連DVD都唔識欣賞，莫講話比DVD更正既HDTV啦。正如牛趙牡丹，你同隻牛講，喂，呢隻牡丹雖然好食，但果隻百合仲正呀。算吧啦～～

論節目，高清頻道有乜野睇先？無線高清頻道平日同翡翠台一模一樣（係畫面靚D），只在周末有獨家節目，喂，周末有幾可會睇電視呀？係都出去蒲啦！亞視條高清頻道好似有D誠意，但亞視會有幾好睇，大家心照。而標清呢？兩個台加埋已經有成10條頻道，仲未計收費電視（我屋企個now寬頻電視都好少睇），根本就睇唔晒。

論硬件&成本，要睇高清，首先就要有部37吋，37吋喎，我個組合櫃個電視窿根本就放唔到一部37吋電視機！就算肯畀錢買，買左番黎電視機兩邊頂住玻璃櫃門，咪盞搞！仲有，高清機頂盒比標清機頂盒貴成倍咁滯，而家標清機頂盒炒價$1300左右（齋睇標清頻道），高清機頂盒炒價去到坐底$2600（睇晒所有標清&高清頻道），計落，為左兩條唔荒成日睇既頻道而畀多千幾銀，冇著數咯！

anyway，我住荃灣，標清又好，高清又好，都要去到明年8月先有得睇。