救救我們的下一代！

昨晨去醫院覆診，遇著兩件事，心裡感到不吐不快。

早上繁忙時間等專線小巴，等了接近廿分鐘才有車！我相信有班車誤點，因為平日頂多等十分鐘。正因為候車時間較長，乘客頗多！雖然衹是第二個站，我上車後便已客滿。

上車後我心裡盤算緊一些事，冷不防小巴突然停下。我抬頭一望，見身在土瓜灣，車前有一約廿多卅歲男子企左響小巴前面，雙手攤開攔住架小巴，目露兇光，咀裡念念有詞；但因為司機並冇打開車門，所以聽不到那人講什麼，祇可以肯定佢係鬧緊個小巴司機。

又難得喎！司機並冇打開窗跟他對罵----正是一隻手掌拍唔響！果位仁兄鬧左一輪，自己冇癮走回行人路上。還好那裡是小巴站頭，所以即使滿客、小巴也駛得頗慢，否則佢咁樣衝出嚟，分分鐘俾車車死！

小巴繼續前進，司機才開腔：「依家香港地「民權」太大啦！有位唔俾佢上就話啫，冇位點俾佢上喎！佢要投訴咪向小巴公司投訴囉，佢鬧我都冇用架，真係惡就得咩？」

坐在司機位後一位婆婆搭訕：「香港地啲後生仔冇鬼用，香港政府更加冇用；拉左人都仲要等成年先審，真係等到人都死埋、唔駛告添(佢講緊雙貪？唔駛吖，最近廉署拉果班人中，其中一位當事人咪唔響度囉)！你睇吓星期坡，政府話咩就咩嘢，邊個敢反對？你睇吓澳門，澳門人勤力工作，政府有盈餘便派錢回饋市民；(澳門人勤唔勤力我唔知，不過香港都好多勤力嘅人，祇不過係上左年紀嘅人囉！後生果啲唔怕得罪講句，十個之中遇倒一兩個正常嘅僱主都要還神---我舊公司喜歡聘用年輕人，呢樣係我經驗所談)」估唔到婆婆都好留意時事喎！

回程時，途中有一對母子上車，就坐在司機位後的雙座位。兒子先上，卻叫母親坐入窗口位。後面一位婆婆對兒子說：「好乖喎！讓個窗口位俾媽咪坐。」

該位媽媽面紅紅答：「佢係怕晒，所以叫我坐窗口位！」

如果係果位媽媽錫住個仔，怕佢晒親，咁嘅安排無可厚非(咁咪縱到依家啲年青人唔捱得囉)；但係因為個仔自己怕晒，己所不欲、卻施於娘親！唉。

香港教育係咪好失敗吖！教到人人都自我中心，當自己係「倚天劍、屠龍刀」？所以可以號令天下，莫敢不從；「倚天」一出，誰與爭鋒？