人心惶惶！

呢輪騙案何其多，攪到人心惶惶！不過個人認為：錢搵來不易，那會咁容易俾人騙去幾百萬？除非佢地本身身有屎，才會輕易相信人！再者，騙徒可以獲得受騙人的回鄉證資料，中間冇內鬼又幾難搵人信！

上星期收倒匯豐銀行一封掛號信，告知我早前參與銀行一項活動，抽中「金銀紀念章一對」，為999.9黃金，重5克。

當時第一個想法係：我記唔起有參與過銀行任何活動，何來有獎？第二個想法：我成世咁黑仔，好嘢點會輪到我？第三個想法：呢輪多騙案，更有人利用匯豐銀行名義行騙，我會否被騙？

前日反正要去覆診，咪順便去領獎囉！攞獎地點係佐敦「周大福金行」，咁可信程度又較高嘅！但係入得去金鋪，淨係攞獎唔幫趁，會唔會俾人「妙」？假若幫趁佢、咁咪執條鞋帶累身家！

入到金鋪將領獎信件交給一位女職員，佢好殷勤咁招呼我坐響擺放鑽石飾物的柜位前，還囑咐一位阿叔斟杯茶俾我。心諗：領獎啫！一手交信、一手交獎咪得囉，唔駛攪咁多嘢啦！果啲鑽石我真係睇唔上眼，因為我屋企啲玻璃，粒粒都比佢更大、更耀眼！

女職員好有禮貌咁叫我等候，佢話叫左人去攞獎品出嚟---前前後後都等左五分鐘有多！其間我同女職員講：「我都唔知我幾時有參加過抽獎？」

女職員：「啊！你係「匯豐銀行」特選客戶。獲獎嘅人數都唔少架！」

我：「但係相對「匯豐銀行」客戶人數就唔會多囉！」

最終有人交盒獎品俾女職員。女職員打開個盒俾我檢查：「幾靚架，留作紀念啦！」

我份人淨係認錢嘅啫：「拎佢嚟賣，你地會唔會回收吖？」

女職員：「會！跟牌價囉。但係果個銀幣就唔收！」

唓！牌價都係$1,598。銀章唔收，咁就五百蚊都唔值啦！既然係羊年銀章，等到下一個羊年(都冇楊過等小龍女咁耐)，睇吓會唔會升值？

最後，都要讃吓該位女職員。雖然個人認為果日係第一日可以領獎之日，理講上領獎嘅人會較多；如果係我，一定預先放定幾份響度，唔駛客人等咁耐，差唔多派晒，又再拎定幾份出嚟備用。依家嘅安排，個人認為係希望客人能夠逗留久一點，可能有機會睇中貨品，繼而幫趁！雖然我結果冇幫趁，果位女職員最後都同我講：「希望第日有機會再為你服務！」

今時今日，好難得仲有咁好服務！抵讃。