「粵曲演唱會」觀後感

我甚少觀看「粵曲演唱會」，祇是間中因要捧曲友場而出席。不過，祇要我決定出席，亦甚少祇聽一兩首便離場-----既然參與，便盡量觀看全場，以示尊重！

上星期剛觀看了一場「粵曲演唱會」，算是有水準架啦----七首曲全部啱拍子、音亦準：好難得架啦！依家睇演唱會有邊一場冇人甩曲甩到阿媽都唔認得、啲「叮、板」跌到一地都係？

即使如此，大半場都係悶場！何解？選曲問題囉！

我間中與一些曲友講及佢地揀曲出「騷」以何為考慮因素？有答：長短曲同價，梗係揀長曲啦！抵啲吖馬。於是一個二個揀新曲唱，因為依家啲新曲，作曲者好似作到收唔倒科咁，首首都過半小時。需知道新曲對觀看「粵曲演唱會」者而言，既陌生亦難有吸引力，特別是表演場地乃社區會堂，觀眾多是長者，更難有共鳴！當然，曲友解釋：社區會堂的長者主要是為了完場有禮物收、或者坐響度涼冷氣而來，但如果所選曲目是他們熟悉者，情況便有所不同。我啱啱呢個月參與果場「騷」便有同樣問題。

當然，新曲唔多唱又如何能廣為人熟悉呢？這便是選場的問題：假如是「康文署」場地，出席者大多是懂唱粵曲、或是是粵曲班同學，可能他們也學過這些新曲，情況會稍有不同。但是，那首新歌是否好聽、唱者又是否唱得動聽又是另外因素。

新曲唔得，係咪舊曲一定得？咁就要睇吓係咩嘢曲啦！自問雖然學唱粵曲祇是呢十年間嘅事，但係聽電台粵曲係陪住我成長嘅，如果果啲舊曲連我都冇印象、冇好感嘅，其他觀眾又點睇？有人自以為藝高人膽大，專搵啲難唱嘅舊曲嚟唱，冇共鳴、話之你唱得幾好(又或者幾唔好)？中場休息去洗手間就最多真說話聽---唔好盡信嚟捧場嘅朋友之言！

但是，如果整場演唱會都是新曲、又或者是悶曲，便一樣破壞成個演唱會！

何謂「悶曲」？呢樣嘢最難下判斷----觀眾感受咪最真囉！

從曲友口中所得：曲友識唱嘅曲佢地就覺得好聽(因為自己有共鳴)！但係佢地冇從聽眾角度去諗；而主辦單位又任由「唱口」自由選曲，於是便有機會出現全場七首都是文場曲、又或者全場都是武場曲，嘈到觀眾耳都「嗡」！

話又說回來，依家籌辦「粵曲演唱會」，既驚冇唔夠唱口參與(所以祇要肯俾錢參與，話之你拍子、音準冇樣得準，一樣來者不拒)、又驚批唔倒場(唔係個個可以走後門嘅)；批得倒、又搵齊腳仲有得揀咩？所以依家啲演唱會真係冇興趣去睇、去聽！

想當年我自己籌辦果幾場演唱會：因為我唔憂搵唔倒唱口(唔賺錢就唔驚搵唔倒人啦、仲大把有得揀！祇會順得哥情失嫂意，因為要因應我想搵咩嘢人唱邊類曲)，亦心知每個唱口的強弱處，所以每一場都會將唔同曲種間開：文場、武場、諧趣兼而有之！因為自己攪，如果唱口揀嘅曲偏埋一邊，我會盡量勸佢地改曲(式者我自己改曲)，唔想悶親觀眾。

依家「粵曲演唱會」經常小貓三四隻，問題如下：

一. 曲目悶親人；

二. 唱口水準未達標(淨係要求啱拍、啱音咋)；

三. 很多觀眾是為捧朋友場而出席：朋友未唱唔見人，朋友唱完便一窩蜂走入後台拍照交差，然後走人；我即使去捧朋友場，亦從不會入後台，如果要探班，亦祇會在開場前。

四. 呢樣嘢最差：有些唱口一早叫朋友嚟捧自己場(唱頭曲、或頭一二首曲)，唱完便叫朋友跟佢出去食嘢，自己完場再回來謝幕。呢種做法主要是想俾人覺得佢多捧場客，其他唱口冇人捧場，用心不良要不得！(有票者走左，冇票者即使全場多的是空椅也未能入場)人同此心，結果咪....

當然，我間中都會睇唔完一場「騷」便離開，問題是：頂唔順！