滷豬手

以前介紹過「紅糟豬手」與「話梅豬手」製法。早兩日「頭條日報」有個「滷豬腳」食譜，不過用料頗多(一隻豬前腳、一隻豬後腳)，一般家庭一餐冇可能食得晒；兼且用壓力煲：壓力我大把，偏偏冇壓力煲！所以我自己改良過；而且，個人祇喜歡食皮包骨嘅豬手，貪佢冇肉(肉煮得耐會鞋)，得皮同筋---純骨膠原。

「百佳」有急凍「巴西豬手粒」賣，一包兩磅約廿多塊錢。我比較喜歡響「街寶」買，除了較便宜外，貪佢有得揀---我唔鍾意啲腳趾！

材料：

急凍豬手粒約兩磅 

上湯/水約1,000毫升

蒜頭三瓣拍扁

蔥段2條

生抽50毫升

醬油膏80毫升

米酒50毫升

糖1 1/2湯匙

胡椒粉

八角一粒

香葉(月桂葉)三片

甘草一片

冰糖

一. 豬手粒解凍。煲滾一鍋水，內放胡椒粒或薑蔥、1茶匙白醋飛水5分鐘，沖洗乾淨。

二. 燒油爆蒜頭、蔥段，下豬手粒爆炒一會，加入所有其他材料(冰糖除外)煮滾，轉小火炆一小時，試味，以冰糖調味，再炆一小時。

註：

一. 由於所用生抽、醬油膏，唔用牌子味道相差很遠，一定要自己調節。

二. 加白醋飛水可去豬手肥膩。真係唔肥架，即使攤凍左都冇凝固。

三. 個人依然比較喜歡食「話梅豬手」，貪佢清爽。「滷豬手」雖然味道唔錯，亦稔滑，但係呢個煮法食落較「漏」，啱啲喜歡濃味嘅人。或者冬天食會較適合。

四. 可預早整定：一早炆個半小時，臨食前再細火炆半小時。或者一早煮好，食前加熱。