你還愛佢嗎？

一槍焫散九重天

盡拆圍場共並肩

終於發現唔多妥

欲哭無淚語無言

約在十五年前、花旗與歐盟聯手在中東引發一場名為「阿啦拔之春」嘅民主運動、到咗十五年後嘅今天開花結果、數以百萬計來自中東和北非嘅難民湧向歐洲去。目前歐洲主流意見都是不願多收難民。雖然德意志一姐墨黑耳提出歐盟成員國合力收容難民、但原來亦只屬曲高和寡。北列顛答應收容兩千難民之後國內有聲音傳出、寧願退出歐明也不肯再收容難民。花旗顯現得更加小器、只答應收容三百名難民。正在大眾都感到頭痛之際北列顛忽然有所發現、前指出在四百萬名難民之中混入了數千名醫師蘭閣恐怖分子。咁講法、歐盟終於能夠以國家安全為理由拒收難民啦！係嘛？其間胸牙脷一哥說得最坦白不過。他說若然不制止中東難民繼續湧入嘅話、歐洲人就要面對喧賓奪主和淪為小數民族之危。看來、西方對百萬難民湧入感到吃不消。之不過、一旦下逐客令嘅話、他們以之為傲嘅「人權」價值觀便會全面破產矣！

在下記得多年前安南難民湧到本城來、山姆大叔和事頭婆都勸紫荊人抵嚇諗、暫時照顧班難民、日後聯合國會還錢、而歐美等國就會派船來將他們接走。但係難民猶如屎坑三姑、易請難送、於是社會上又響起遣返難民之聲。就在那個時候、自稱日日做看更嘅李賣田便撲出來發放那些甚麼「今日你拒絕收留別人、它日人家也拒絕收留你」嘅謬論。總言之、講到大歸形同大限、到之期之後唔走就死梗咁款。但係事實證明紫荊人被欺騙了！因為聯合國難民專員公署欠債不還錢、花旗和北列顛更加係講完當冇講過。結果在有關當局在鬨鬨氹氹之下、才能夠將滯留嘅難民分批遣返原地。今日歐洲同樣面對數以百萬計嘅難民潮、同樣不勝負荷、同樣係大多數人都不願意挨義氣收容難民。但花旗這個始作恿者卻變成旁觀者、彷彿「阿啦拔之春」係完全與之無關。這證明甚麼？咪就係證明咗、那些所謂民主和人權等美麗嘅名詞、全都是用來呃鬼食豆腐嘅屁話。呢嗱、有事實為證架、真係信嗰個、死嗰個、重係死咗都唔知自己錯嗰隻。吓、仲係唔信？那就唔該你快啲去打開份報紙睇真下、究竟今日中東嘅情況係點架啦！