幫「亞視」，打「無線」？

亞視得富豪注資，不過唔知能否通過「廣管局」發牌果關？

昨早「新城電台」呼籲聽眾建議有咩嘢好計獻俾亞視，令佢起死回生，唔好讓「無線」一台獨大。

我同「亞視」往日冇怨，同「無線」今日亦冇仇，祇不過我依家對「無線」、同對「港台」一樣，係哀莫大於心死！

響我記憶中，「亞視」曾經有一段時期真係風光過，打低「無線」架！祇不過，大部份時間都係後者獨大；冇法子啦！六叔捨得落本---要人材有人材、要錢財有錢財！不過，俗語講得啱：富不過三代！靠食穀種？食得幾耐吖。真係好懷念周梁、葉潔馨、蔡和平揸fit嘅年代！

其實過去廿幾三十年，我都算係「無線」忠實擁躉----係「亞視」太過唔爭氣，所以「無線」節目即使唔好睇、自己唔專心睇，亦都唔會轉台！近呢十幾年「無線」都係食緊穀種，依家轉左人真係，唉！

近呢幾年「無線」真係好唔掂！編、導、演瓣瓣唔得---可能因為要用人惟親掛，話之佢演技得唔得啦！亦可能因為慳錢掛：專搵當屆港姐，又話之佢地得個樣、甚至連個樣都唔得！

至於編劇簡直係天馬行空，唔知依家啲編劇係咪不食人間煙火，淨係識得閉門造車呢？又抑或太年青，冇人生經歷，所以「愛回家」會搵一對由上至下、由裡到外都唔似情侶嘅做情侶、作到冇嘢好寫、便寫兩個大男人晚晚為左爭女人而做埋啲無聊兼白癡對白、舉動；一個大男人連搵份正經工作都懶嘅廢青.....唔知呢套劇想傳達啲咩嘢訊息？寫實？

不過，依家「亞視」即使有錢都冇用----得番幾個月咋！拍套似樣啲嘅劇都唔夠時間啦。

以前「無線」啲藝員係響木人巷長大，演技係浸出嚟嘅；依家有演技果批一個二個上左年紀，後生果批除左年青之外便「百冇」，最慘仲係一個二個整到怪形怪相(早前播完果套「風雲天地」係表表者)！演藝出身有幾位算係有演技，但係不知何解個個都岩岩嚵嚵？雖然藝員唔一定要靚仔/靚女，一套劇總要有綠葉扶持至得---但係響「老表」係列裡，同一套劇集所有岩嚵嘅人一齊，真係睇到發惡夢！

上天真係好公平架，俾得個靚樣你，可能把聲唔得！以前未有電視、淨係聽電台節目的時候，聽眾很多時因為播音員的靚聲而成為「粉絲」，其後部份播音員因擁躉多而拍電影，觀眾立刻哇然---嘩！原來心儀嘅播音員個樣....

口才好、計仔多亦一樣！N年前，某位老板問我：「Van，你信唔信矮仔多計呢句說話呢？」佢當時係講緊某位同事，人生得矮細，但頭腦靈活，轉數快！

我咁講無意得罪啲矮嘅、醜嘅人！每個人都有自己嘅優點、缺點，重要嘅係唔好錯配：邊類人做邊類嘢。

所以，祇要有個電視台能夠爭爭氣氣，做番啲正常嘅節目俾觀眾睇，話之佢係「亞視」又好，其他台都好啦！

咩嘢叫做正常節目？劇集合乎情理、時事節目則持平，咁嘅要求好低啫！

不過.....可能唔合情理果個係我喎！依家年青人真係有嘢唔做、啲人一日到黑顧住追女仔、整容係潮流、唔整至out........噢！