大力河
大力河
大力河

答財爺的疑竇

2015/10/03 17:25:57 網誌分類: 財經
03 Oct

見報攤有財爺封面的財經雜誌,付了廿元便拎回家。財爺的專訪中有云:[香港人好得意㗎,樓市跌係無人買的,我們的樓市係愈升啲人先愈買,哈哈......咁可以點呢?每個人自行計算吧。]

皆因在香港充斥地產霸權的社會裏,住房早已被視為[投資工具],市民動輒押上半生積蓄,見勢跌當然不敢入市。價升時便預期續升而追貨。對金、股、匯也是如此,人仔急貶,個個爭相把人仔兌回港元也是這個道理。萬物總有定期,老番也說:[What goes up must come down],意謂乜鬼嘢會升的也終會跌下來。

早前財爺話會因應市況而調整政策,話音未落振英哥便主動重申不會減辣,似乎想摑財爺一巴掌,都係習總握手惹的禍。又係嘅,頭號政敵說是,振英哥當然會說不啦。振英哥話....年青人很難置業.........。睇嚟振英哥任期內樓價無20%跌幅是不會撤辣的。10%太少了,20%都係斷估,有此跌幅[年青人]也該收貨吧,咁[年青人]咪會努力向上游搵錢買樓而唔會覓地再佔囉!

跌20%(從歷史高位計)後撤辣,那些帳面仍有倍數計利潤的會即時放盤求售.........40%或50%也會急不及待吧。情況便有如庄家股升了兩倍後停牌三個月,復牌當日獲利貨湧現,股價一般會一瀉如注,除非庄家接貨或甚再推高股價,但香港樓市誰做庄家接貨呢?