愛回家：快回家！

內地睇唔倒「頭條網」，所以在上海工作嘅姪女每次回港，都會追看番我寫嘅網誌。

上月尾佢回港，一邊重溫我的頭條網誌，邊問：「你仲係咁勤力，天天寫？」

我：「係呀！依家當佢好似份工咁(唉！做義工)。不過，每天搵題材唔容易架，你有咩嘢好建議？」

姪女：「寫(愛回家)啦！」

我：「吓！寫左好多次咯喎，仲有咩嘢好寫。」

姪女：「「叫佢快啲回家啦！」

我：「舊果輯都唔好睇啦！當時你又話幾好，因為得閒睇吓、唔得閒又唔睇都冇損失！」

姪女：「但係依家果輯太過唔掂啦！張繼聰同黃翠如！」

我：「佢地都走左啦！不過唔知會唔會返頭(哎呀！原來呢兩個字唔可以隨便講架，會出事架)啫。張繼聰個樣真係唔得，但係佢有演技呢樣嘢係唔可以否認嘅！佢係好嘅綠葉，但係做男一又真係.....總好過佢隔離果個，除左有後台之外，既冇樣、又冇演技吖！」

姪女：「係囉！果套(收規華)幾難頂呀。」

我：「冇法啦！聞說高層要捧佢做視帝。」

姪女：「依家套(愛回家)，得麥包同果兩個耆英嘅片段稍為有啲嘢睇咋！成日講兩個傻仔爭女同個一個廢過廢物嘅細佬，睇到人都癲！」

我：「麥包戲好都冇用！編劇編埋啲天馬行空嘅情節，真係英雄無用武之地。」

姪女：「果套(張保仔)夠死啦！男一女一演技浮誇到死。」

我：「你都知我每次見倒果位港姐，都會諗起「愛登士家庭」(唔係我講架，上星期與舊同事晚飯講起，我一提大家都諗倒我講緊邊個)。嘩！真係恕我冇呢啲審美眼光，佢眼同口大到與塊面根本唔成比例；偶然佢登吓眼，我就想起Halloween就到！雖然話睇劇唔好駁劇，但係劇情描述到：

一. 平板電腦/手提電話俾海水浸過，依然用得番，幾咁神奇；

二. 平板電腦，唔駛叉電！啲電用之不盡(將來會唔會就唔知)；

三. 警察短槍浸完咸水，用得倒之餘、仲係冇生锈添；

四. 警察短槍可以連發八粒子彈；

五. 張保仔背部正中中箭，一覺醒來便咩嘢事都冇！

係咪虧佢寫得出呢？黃娣妹嘅角色睇落傻更更，仲要張保仔同十一貝勒哽左佢，真係難為佢地！

喂！又叉遠左啦。講緊「快回家」呀！係喎，唔該你地快啲番屋企，學識左點做人先返嚟啦！唔好教壞晒啲年青人------------咩呢套唔係寫實劇嚟咩？你Out啦，可能呢啲就係現今年青人嘅真表現嚟！