區議會選舉:我點選?一

2015/10/19 08:33:37 網誌分類: 政治
19 Oct

尚有個幾月便是四年一度的區議會選舉。嚴格啲講,區議會算係我個仔,佢係我地係幾手幾腳湊大嘅,1982至今,呢個仔都有卅幾歲啦。

正因為有淵源,見倒依家議會秩序咁差,真係令人心痛!

響政治舞台上,接觸過各黨各派人士,當然裡面有忠有奸、有表裡不一、有演員型、有默默耕耘型、有表裡一樣惡形惡相形、有講一套做一套形.....以前,無論唔同黨派目標幾咁唔一致,但很多時出發點都一樣:為香港好!祇不過大家對同一件事睇法唔一樣;但係祇要目標一致,協商後便會有成果。

依家唔同晒!身為香港議員(甚至係前高官),一方面收香港納稅人酬金、一方面收更大筆外國人錢-----一心向「錢」看!佢地有咩嘢居心,可想而知。

雖然今屆截止提名期完結後,有唔少選區因為祇得一名候選人參選而自動當選,但係我住果區屆屆都要選,想慳番都唔得!

在全港四百幾個選區中,最少有66個選區的候選人自動當選,何解咁多區都自動當選?有學者分析指,自動當選者大部分為建制派人士,反映建制派地區工作扎實,反對派根本無力挑戰,只得棄守;另一個可能咪係鬼打鬼囉!果班「傘兵」化名落區與泛民對打,我又真係好想知道結果係:果班小鬼眼中嘅老鬼要走頭讓路、抑或係薑越老越辣,班人細鬼大消失呢!

至於我會點選?我用嘅係「抽除法」---將最唔理想嘅首先抽出....抽淨果個咪選果個囉!當然,如果響候選人中,你經已有最佳人選,咁就簡單得多啦!但係更多情況係:所有候選人你都唔認識架馬!

唔好諗住過去幾年唔見人,近呢幾個月每天響街度好勤力咁同你打招呼扮friend果啲就係好人(老人家最容易俾呢啲人呃倒),我地叫呢啲做「空降」,即係為選舉而揀個區落腳,佢地有可能唔響呢區住;有少少誠意嘅咪臨近選舉,才搬嚟呢區住,方便佢辦事囉!

咁如果用「抽除法」結果搵唔倒個啱嘅人,咁點選?你有權投「白票」架馬!雖然呢個係下下策,但係揀唔落手咁點算?「傘兵」加「泛民」咪唔駛選囉!不過,我又要行駛身為公民嘅選舉權利,咁咪唯有投「白票」囉!

回應 (1)
我要發表
2015/10/20 12:06:03 回覆

我一向揀政黨,今年華麗轉身,都是選政黨,如無得揀,只好兩害選其輕。

user