新一代打工劣行

2015/10/26 08:29:57 網誌分類: 學習
26 Oct
新一代打工劣行嚇窒僱主

帶男朋友返工?新一代打工劣行嚇窒僱主,令不少僱主感到「頭痕」。記者採訪不同行業的負責人,綜合新一代打工六大劣行,除了帶男友上班及在店舖搞聚會狂歡外,有的更「公主病」發作、找父母代辭職訛稱「有白事」其實去蒲狂遲到等。有人力資源顧問坦言,現今年輕人責任感低,令不少僱主無所適從。

最近網上流傳一張售賣護膚品的公司員工守則通告,要求同事上班時不要帶昆蟲(佢自己都可能係「黃蟲」喎)、男朋友、嬰兒、動物、朋友及同學等不相關的「生物」(係咪指「本土」同「鳩嗚」呢)到店中,如被發現逗留逾三十分鐘,該公司會發出警告信及扣除薪金五十元。記者致電相關公司查詢,職員稱不清楚此事,惟此貼子卻引起不少網民討論新一代的打工劣行。

謊稱家有白事要請假

「你哋終於嚟啦,慢慢傾啦大把時間!」有辦公室經理指,曾有年輕打工仔邀請大班朋友到公司「探班」,霸佔寫字樓接待處大聲喧嘩歡笑,打擾其他進出的客人。雖然她多次勸告仍未能遏止,辦公室淪為派對場所。

年輕女僱員帶男友返工,亦惹起僱主不滿。不少小型服裝店及精品店出現「一人打工,二人同行」的情況,常有女售貨員帶同男朋友上班,更有網民表示曾見過有服裝店職員與男友在店內公然親熱,漠視顧客。

旺角一間時裝店負責人盧小姐說,時下年輕人工作表現差十分普遍,當中以隨意辭職最為嚴重,「好多會隨時唔返,做過唔鍾意嘅,又或者同自己預期唔同嘅,都會立即唔做,有啲仲會唔講聲就唔做(呢啲咪家長都有責囉!佢地唔打工、返屋企伸大手板又有錢洗、有錢浦,咁仲邊有動力打工呢)。」盧表示,最不能接受的是說謊,「我試過有個員工同我講話屋企有白事要請假,但最後畀我發現咗佢去同朋友飲酒,呢個係我最接受唔到。」

在太子經營樓上餐廳的負責人表示,時下青年「例牌」返工遲到,有啲更遲到五至六小時。他補充,有員工擅自離職後,卻由父母代到餐廳領薪水。在油麻地經營樓上咖啡室的張小姐亦批評,年輕人工作態度惡劣,情緒易失控,「試過有人失戀心情差,公主病發作,同個客發脾氣。」她坦言時常要擔任心理輔導員角色,為員工減壓。

「呢一代嘅年輕人責任感比起之前低(所以千其唔好選佢地做區議員:連最基本要求「勤力」都冇),好易話同同事冇偈傾(依家年青人寧願對住手機/平板電腦傾心事,都唔寧願對人講,佢地識得溝通咩)、工作環境悶等等,就話唔做,令好多僱主無所適從。」安俊人力資源顧問有限公司董事總經理周綺萍表示,年輕人打工劣行的確嚇怕不少僱主,至於流失率高的零售、飲食業界,周直言僱主會繼續聘請年輕人,但不少僱主會訂立詳細的員工守則防止劣行出現。

-----------------------------------------

時下年輕人很多都不懂得溝通,此乃事實!各位有興趣不妨響晚間十點半至零晨兩點聽吓「新城電台」節目,你聽吓果啲廿幾歲、甚至卅幾歲打入電台嘅聽眾----連重覆講述當日發生嘅事件,都冇法有層次咁表達出來!真係聽到人火都嚟埋。

某晚一名廿多歲女子A告知主持,表示她的女友B十二月結婚,今年年初表示想請她做姊妹。此女子同女友講,叫她請埋另一位朋友C做姊妹。B表示跟C一早鬧翻,A亦知道此事,所以不擬邀請C做姊妹。

今年年中,B再致電問A是否答應當姊妹;A堅持要與C一同做姊妹。B最終決定與A絕交!

A覺得B過份,打入電台當然希望主持人支持佢立場。誰料幾位主持人同時指出她不是之處。A明知B與C一早鬧翻,何故堅持要人家請B做姊妹?這不是強人所難嗎?B是婚禮的主角,邀請何人做姊妹有絕對權,A惟一有權是拒絕當姊妹、而不是定一些條件作交換!

結果如何?A因為得不到認同,立即掛線!哈哈,這就是現今的年青人----凡事以己為專!

依家班年輕人唔做,仲可以靠屋企養!咁佢地下一代如何?佢地老豆/老母唔死嘅仲可以養埋個孫;但係老豆/老母死埋佢地靠邊個?佢地下一代又靠邊個?等領綜援?綜援都要有人交稅先至得架,冇人交稅,去邊度搵錢發放綜援?

唔好忘記過多廿年,香港正面對老年人數激增,勞動力人口減少的情況!

如何是好?

回應 (0)
我要發表
user